Një krim i rëndë tronditi mesditën e sotme Gramshin.
Ngjarja ndodhi pranë shkollës 9-vjeçare “Asllan Shahini”, ku humbi jetën 15-vjeçari Fatjon Bici, pas një sherri mes adoleshentëve që degradoi në përdorimin e thikave.
Policia raporton se sherri ndodhi në lagjen “Sport 2” ky pas një konflikti të çastit mes tyre, i mituri u godit me thikë në kokë dhe në zemër, e për pasojë humbi jetën.
Fatjon Bici, 15-vjeçari që gjeti vdekjen pas një sherri mes pesë të miturve ishte kushëri me Marko Liçin, i cili mbeti i plagosur në të njëjtën ngjarje. Mësohet se shkak ka qenë një sherr i nisur në rrjetet sociale, pak ditë më parë. Të dyja palët ishin takuar dhe dy javë më parë në një park lojërash.
Sot, është zhvilluar takimi sqarues mes të rinjve, që përfundoi me një viktimë dhe një të plagosur. Bici u fut të shuante sherrin mes kushëririt të tij dhe tre të rinjve të tjerë dhe mbeti i vrarë. Liçi u plagos dhe ndodhet në spital jashtë rrezikut për jetën.
- Familjarët shpërthejnë ne lot kur shohin trupin e pajetë të nxënësit
Familjarët e Fatjon Bicit, 15-vjeçarit që u vra me thikë në Gramsh kanë shpërthyer në lot kur kanë parë trupin e pajetë të të miturit.
Në video, ata shihen që kanë rrethuar autoambulancën, ndërkohë që 15-vjeçari, ende i plagosur po dërgohet për ndihmën e nevojshme mjekësore. Në sfond dëgjohen të gjithë duke qarë e bërtitur. Fatkeqësisht, ai ndërroi jetë në spital.
- “Kush është më i fortë”/ Vrasja e nxënësit në Gramsh, flasin shokët: Ja çfarë ndodhi
Nxënësit e shkollës 9-vjeçare “Asllan Shahini” ku ndodhi vrasja këtë mesditë kanë treguar se si nisi sherri mes adoleshentëve.
Njëri prej tyre thotë se 15-vjeçari Fatjon Bici që mbeti i vrarë ka hyrë të shuajë sherrin mes kushëririt të tij dhe tre të tjerëve. Një tjetër thotë që sherri është parë nga shumë persona, por askush nuk ka ndërhyrë. Sipas një nxënëseje, policia gjithashtu ka mbërritur shumë vonë. Pjesë nga prononcimet:
Nxënësi i parë: “Ata të dy ishin kushërinj, janë të dy tek shkolla jonë në klasë të 9-të. Ka ndodh për shkak të rjeteve sociale, kush është më i fortë dhe kush është më i dobët.”
Nxënësja e dytë: “I njihja të dy djemtë dhe u tremba shumë. Më duket se kanë ftuar njëri-tjetrin për sherr dhe kanë përfunduar këtu pastaj. Ngjarje të tilla ka pasur shumë, jo duke përfunduar kështu por ka pasur. Këto ndodhin se vetë djemtë duan të mburren kush është më i fortë dhe pastaj ndodhin konflikte.”
Nxënësja e trete: “Mesa mora vesh i kishin parë shumë veta dhe nuk ndërhynë. Dhe policia erdhi shumë vonë. Mesa mora vesh u bë për një lojë në rrjetet sociale.”
- Çfarë njofton policia për ngjarjen e rëndë?
“Rreth orës 13:30, në lagjen “Sport 2”, Gramsh, në rrugë, pas një konflikti të çastit mes 5 adoleshentëve është plagosur rëndë me mjet prerës (thikë), njëri prej tyre, shtetasi F. B., 15 vjeç, i cili pasi është dërguar në spital, ka humbur jetën për shkak të dëmtimeve. Shërbimet e Policisë, me marrjen e njoftimit, kanë shkuar menjëherë në vendin e ngjarjes.
Pas ndjekjes nga Policia, janë kapur dhe janë shoqëruar në Komisariat, 4 adoleshentët (ndërmjet tyre dhe autori) e përfshirë në konflikt, konkretisht shtetasit E. K., 15 vjeç, A. C., 14 vjeç, O. C., 14 vjeç dhe S. M., 15 vjeç të cilët do të merren në pyetje nga specialistët për Hetimin e Krimeve, në prani të prokurorit, të psikologut dhe të prindërve të tyre.
Grupi hetimor vijon veprimet për zbardhjen e rrethanave të kësaj ngjarjeje dhe përcaktimin e autorësisë së ngjarjes. Në përfundim të veprimeve, do të ketë njoftim për arrestimin e autorit dhe për masat që do të merren për 3 shtetasit e tjerë të shoqëruar”, njpofton policia.
