Një komisioner i koalicionit Bashkë Fitojnë është dhunuar në Fushë-Krujë këtë të diel. Ngjarja ka ndodhur në qendrën e votimit 1302/1.
Agron Loka, kandidati i “Bashkë Fitojmë” për këtë bashki, tregoi për mediat se komisioneri u “tërhoq zvarrë” nga tre personat. Për ngjarjen, ai fajësoi “bandat e regjimit”.
“Bandat e regjimit kanë dhunuar komisionerin e opozitës. I bëj thirrje votuesve të bashkisë të dalin masivisht se ndryshimi është i padiskutueshëm. Komisioneri është marrë zvarrë nga karrigia e pozicionit nga tre persona që s’kanë lidhje me procesin e votimit. Një prej tyre është identifikuat”, tha Loka, i cili shtoi se policia është njoftuar lidhur me incidentin.
Uniforma blu kanë qenë në pranishme në qendër votimi.
Në një njoftim zyrtar, policia thotë se komisioneri është dhunuar nga një person për radhën e votimit.
“Rreth orës 10:10, Komisioni i Qendrës së Votimit 1302-1, KZAZ Nr. 20, Fushë Krujë, me vendimin numër 1, ka kërkuar ndihmë nga Policia e Shtetit, pasi në këtë qendër votimi një shtetas (votues) ishte konfliktuar me një anëtar të Komisionit. Shërbimet e Policisë, menjëherë pasi kanë marrë njoftim, kanë shkuar në Qendrën e Votimit 1302-1, ku ka rezultuar se shtetasi E.K., i cili kishte shkuar për të votuar në këtë Qendër, kishte debatuar me një anëtar të Komisionit të Qendrës së Votimit, shtetasin I.H., dhe më pas e kishte goditur atë me grusht, për radhën e votimit. Shtetasi E.K. është shpallur në kërkim dhe po vijojnë kontrollet për kapjen e tij. Po me vendim të Komisionit të Qendrës së Votimit, pas normalizimit të situatës, punonjësit e Policisë janë larguar nga Qendra e Votimit. Materialet do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme”, njofton policia.
