Në të dytën dalje për mediat nga shtabi i tij elektoral gjatë ditës së sotme, kandidati i koalicionit “Bashkë Fitojmë” për bashkinë e Tiranës, Belind Këlliçi i është drejtuar kryeqytetasve me një thirrje për të dalë masivisht në votime.
Kur mbeten edhe më pak se 90 minuta nga mbyllja e qendrave të votimit, Këlliçi kërkoi të shpërndante mesazhin se ndryshimi është në duart e qytetarëve dhe se do duhet të shprehin qëndrimin e tyre pro rotacionit politik me votë.
“Dilni dhe merrni pjesë sepse është një shans që nuk do na vijë më. Është i një rëndësie jetike të qytetit. Shifrat tregojnë se jemi në 40% të numrit të pjesëmarrësve dhe do duhet ta rrisim këtë shifër.
U bëj thirrje të gjithë naçuve dhe atyre që kemi takuar, dilni merrni pjesë në votime dhe ta shndërrojmë këtë ditë në ditë feste për të ardhmen e të gjithëve”, tha Këlliçi.
Deklarata e plotë e Këlliçit:
Janë 90 minuta që në fakt kërkojnë impenjimin tuaj, për të dalë e për të votuar, për të ndërruar 4 vitet e ardhshme. Establishmenti dhe të korruptuarit nuk duan që ju të merrni pjesë në votim.
Ndaj i drejtoj një thirrje nga zemra të gjithë qytetarëve, në qytet, në fshat, të rinjve e të rejave; dilni e merrni pjesë masivisht në votim deri në orën 19:00.
Është një shans që nuk do të na vijë më për 4 vitet e ardhshme për të ndryshuar fatet e kryeqytetit tonë.
Është një shans i artë, një mundësi e veçantë që duhet ta kapi çdo i ri dhe e re në qytet. Është një shans për të gjithë të moshuarit, pensionistët për qytetarët, sidomos për ata që janë në zona rurale dhe që janë lënë të harruar prej vitesh e vitesh me radhë.
Dilni e merrni pjesë në këtë proces votimi sepse është e një rëndësie jetike për kryeqytetin.
Shifrat tregojnë se jemi në kufijtë e 40% të pjesëmarrjes do të duhet që të kalojmë këtë shifër, duke e rritur pjesëmarrjen. U bëj thirrje naquve dhe njëherë edhe cakëve të Tiranës dhe të gjithë atyre që jemi takuar, jemi parë në sy, kemi folur me njëri tjetrin dhe kemi thënë se kur do të afrojë 14 maji. Epo 14 maji është sot kemi hyrë në finale.
Finalja po luhet, tashmë mbetet vetëm për të fituar. Dilni merrni pjesë në votime le ta shndërrojmë këtë ditë në një ditë feste të jashtëzakonshme për Tiranën, për kryeqytetin tonë dhe të ardhmen e të gjithë të rinjve në Tiranë.
Dilni e votoni, ndryshimi është në duart tuaja. Votoni!
