Presidenti aktual turk, Recep Tayyip Erdogan dhe rivali i tij në zgjedhjet që zhvillohen ditën e nesërme, Kemal Kilicdaroglu, kanë vijuar përplasjen në distancë edhe gjatë ditës së sotme, pavarësisht heshtjes zgjedhore.
Fushata zgjedhore që si kurrë më parë ishte e tensionuar në Turqi pasi Erdogan rrezikon të humbë pushtetin që ka akumuluar në dy dekadat e fundit, nuk mund të përfundonte pa deklarata të ashpra për rivalët në garë.
Akuzat e rënda ndërmjet kandidatëve për president, por edhe përplasjet fizike dhe zbrazja e armëve ndaj zyrave elektorale të opozitës, kanë bërë që Kilicdaroglu në një tubim parazgjedhor në qytetin Samsun të vesh edhe jelekun antiplumb.
Kështu ka pohuar për Reuters një burim i paidentifikuar i partisë opozitare, CHP. Agjencia thekson se kishte informacione se Kilicdaroglu “mund të sulmohej”, ndaj lideri i opozitës përdori mbrojtjen më të mirë.
Ai shtoi se një anëtar i rojës së sigurisë mbante një armë në duar dhe ishte gjatë gjithë kohës afër 74-vjeçarit, i cili mbajti fjalimin para popullit.
Kjo ishte hera e parë që mbrojtja e kundërshtarit të Erdoganit ka qenë kaq e dukshme gjatë një fushate zgjedhore.
