Policia e Vlorës ka vendosur në pranga 34-vjeçari Grigor Lika, i cili akuzohet se tentoi të trafikojë një sasi prej 1 ton drogë drejt Italisë së bashku me 5 persona të tjerë në gusht 2022.
I riu është arrestuar në lagjen “1 Maji” të qytetit bregdetar. Ai ishte shpallur në kërkim, pasi Gjykata e Vlorës në datën 10 gusht 2022, i ka caktuar masën e sigurisë “Arrest në burg”, për veprën penale “Trafikimi i narkotikëve”, kryer në bashkëpunim.
“Shtetasi G. L., në bashkëpunim me 5 shtetasit e arrestuar në muajin korrik të vitit 2022, në Vlorë, dyshohet se ka transportuar një sasi prej 992 kg lëndë të dyshuar narkotike marijuanë (të ndarë në 153 pako), me 3 skafe, drejt një mjeti tjetër lundrues, në thellësi të ujërave të detit Jon dhe më pas e kanë nisur atë drejt Italisë”, njofton policia.
Operacioni i koduar “Syri” u zhvillua nga Drejtoria Vendore e Policisë Vlorë, në bashkëpunim me Guardia di Finanza-n, Delta Forcë, Drejtorinë Vendore për Kufirin dhe Migracionin Vlorë, Departamentin për Kufirin dhe Migracionin dhe Departamentin për Policinë Kriminale, në Policinë e Shtetit.
Gjatë këtij operacioni, u sekuestruan lënda narkotike, 2 automjete dhe 4 mjete lundruese që u përdorën për transportimin e saj.
