Njëherë shfaqet me shpatën e opozitarit, më pas flirton me pushtetin dhe pothuajse gjithmonë arrin të marrë përfitime prej tij. Skema është bërë kaq evidente sa që autori i saj, Shpëtim Idrizi dhe partia që drejton PDIU është pagëzuar edhe si “tregu çam”.
Disa muaj para lokaleve të 14 majit 2023, Shpëtim Idrizi shfaqej si opozitar, ndërsa lëshonte akuza të ashpra, por me baza, ndaj kryeministri Edi Rama. Qëndrimi kritik ndaj kreut të qeverisë u zbut, ndërsa lufta duket se u kthye në dashuri – me Idrizin që mori rolin e një paterice të shefit të ekzekutivit duke goditur opozitën.
Idrizi shmangi takimet me kreun e opozitës Sali Berisha, ndërsa më vonë bëri të ditur qëndrimin se nuk do ti bashkohej koalicionit opozitar për zgjedhjet vendore dhe as do ti mbështesë.
Me tej, u kthye në një stërkëmbësh për opozitën. Në atë që u komentua si një komplot mes drejtuesit të PD-së së vulës, Shpëtim idrizit të “tregut çam” dhe të plotpushtetshmit Edi Rama, KQZ dhe KAS vendosën që në gjysmën e tavolinave të numërimit, koalicioni “Bashkë Fitojmë” të mbetet pa numërues. Nga katër, 2 i mori PS, 1 PD e vulës dhe i katërti u nda mes PL dhe PDIU-së. Çështja është apeluar nga Partia e Lirisë – pjesë e koalicionit opozitar “Bashkë Fitojmë” – në Kolegjin Zgjedhor.
Idrizi ndërkohë vijon ti vijë në ndihmë Ramës para betejës zgjedhore dhe rasti i fundit ishte këtë të premte.
Ai mbështeti arrestimin e kandidatit të opozitës në Himarë Fredi Bejeri, që nga të dhënat e deritanishme ngjan më shumë si një arrestim elektoral.
Prangosja në fakt erdhi pas përplasjeve që pati me kryeministrin Edi Rama, ndërsa vetë Bejeri i tha publikisht se do ta fitojë Himarën më 14 maj, duke mundur thellë kandidatin e PS-së Jorgo Goro.
Megjithatë, sipas Idrizit, arrestimit i Fredi Bejerit duhej bërë më herët.
Gjatë një prononcimi për News 24, ai ka shpërthyer në kritika ndaj Bejerit, në një qëndrim që në këtë moment i shkon për shtat makinerisë elektorale të Edi Ramës.
“Organet e drejtësisë duhet të vepronin më shpejt ndaj Belerit. Ai është përsëritës. Ai fliste ditët e fundit për helenizmit. Njeri butaforik që ka qenë i dënuar në Greqi, në Shqipëri, që flet për helenizimin e jugut, normal që do të jetë subjekt i SPAK. S’kam dijeni për ngjarjen, por deri sa ka ndërhyrë SPAK është kjo gjë. Për mua duhet të kishin ndërhyrë më parë. Dalja e tij me simbole të Vorio-Epirit duhet të ishte bërë shkak për ndërhyrje më herët. Fredi Beleri është shtetas shqiptar me kombësi greke. Në Himarë po konkurron ata që e kanë vënë, dhe jo shteti grek. Ministrja e Jashtme greke ka reaguar për rastin e Belerit dhe i ka kërkuar ambasadores greke, që të zhvillojë takim me Xhaçkën. Nuk konkurron Greqia në Himarë, por shqiptarët. Duhet t’i drejtohemi me notë proteste ministrisë së Jashtme greke. S’ka asnjë opsion tjetër, s’ka kuptim. Nëse mendojnë se po konkurron Greqia, atëherë duhet të ndërhyjnë. Kjo është arrogancë”, tha Idrizi.
