“Vetëm 48 orë na ndajnë nga fitorja”. Me këto fjalë e nisi Sali Berisha takimin përmbyllës të koalicionit opozitar “Bashkë Fitojmë” në Tiranë, ku thirrjen e fundit e rezervoi për kryeministritn Edi Rama, duke i thënë se duhet të tërhiqet pasi populli do ta matrrë përpara më 14 Maj.
Berisha ishte i prerë në qëndrimin e tij se e diela do të jetë manifesti i një lumi votash për kandidatët e dalë nga “Primaret”, të cilin Edi Rama nuk do ta ndalë dot pavarësisht çdo forme dhe tentative për shantazh në këmbim të tyre.
“Kalojnë në skuta me sejmenët e tij dhe shpërndajnë para. I them, mund të vjedhësh një kovë në lumin që rrjedh, mund të vjedhësh një votë, por lumin nuk e vjedh dot. Të garantoj që rryma e tij, rryma e ndryshimit, rryma e fitores do të të marrë përpara dhe do të të çojë atje ku e meriton. Edi Rama hiq dorë se populli është në këmbë, Shqiptarët sot janë më krenarë se kurrë me votën e tyre, janë më të vendosur të mbrojnë liritë e tyre”, tha Berisha nga sheshi “Nënë Tereza”.
Ish-kryeministri u shpreh po ashtu se kandidatët e opozitës të dalë nga Primaret, janë kandidatët e fitores dhe ata që do të çojnë përpara synimin e opozitës për të ruajtur drejtimin e Shqipërisë drejt BE, ndërkohë që mazhoranca sot premton shkuarjen në BE si vasalë të Beogradit.
“Kandidatët tanë, yje të vërtetë të lirisë. Ata janë kandidatët e fitores. Sonte është një natë e veçantë në historinë e përpjekjeve tonë për liri e dinjitet. Sonte mbyllim fushatën me të cilën ia dolëm të bindim shqiptarët, ti takojmë të bisedojmë me ta, të vendosim bashkë me 14 maj të votojmë ndryshimin, Belind Këlliçin, kandidatët tanë, Igli Carën në Durrës, Bardh Spahinë në Shkodër, Luçiano Boçin në Elbasan. Projekti i tyre është projekti i shndërrimit të bashkive në bashki të qytetarëve.
Sot ne flasim se si do ndalojmë varfërinë e frikshme, si të frenojmë shpopullimin, shkretimin e vendit, si të frenojmë largimin masiv të të rinjve nga Shqipëria,, si të mbrojmë pluralizmin e të shpëtojmë Shqipërinë, si të ruajmë Nord-in tonë drejt Brukselit kur sekti tjetër e nisi Fushatën me eksploziv, e mbylli me arrestime dhe e vijoi me tallava e tallje me qytetarët. Bënë fushatë duke u zotuar se në Bruksel do shkojnë si vasalë të Beogradit”, theksoi lideri i opozitës.
Thirrjen e fundit Berisha e rezervoi edhe për të gjithë socialistët e ndershëm, duke thënë se edhe ata duhet të votojnë koalicionin “BF” duke larguar sektin e “Rilindjes” që ka marrë peng PS-në.
“Kam një mesazh për çdo demokrat, të gjithë kudo jeni më 14 maj të votoni kandidatët e Primareve, të merrni pjesë në votime. 1-shi është fati që përmbys monizmin e largon Edi Ramën. 1 –shi është fati ku ju firmosni fitoren, me të cilën i jepni përgjigjen e merituar armikut të egër të PD dhe pluralizmit.
Mesazhi është i njëjtë për cdo socialist, 14 maji është një ditë shpëtimi për ju. Votini kandidatët e Primareve dhe “BF” që të rifitoni PS të uzurpuar nga një bandë kriminale që quhet Rilindje”, u shpreh Berisha.
