Krenaria që tregoi duke u tallur hapur me qytetarët e Elbasanit teksa i paraqiste imazhe të Inceneratorit 24 milionë euro që nuk funksionon në led wall-in pas tij mbrëmjen e djeshme, duket se ka qenë më serioze seç pritej nga ana e Edi Ramës.
Hipokrit dhe cinik në kulm, Rama e mbrojti Djegësin në remont të Elbasanit edhe mbrëmjen e sotme në studion e emisionit “Now” të gazetares Erla Mëhilli, aspak i shqetësuar se kemi të bëjme me një prej veprave më të rënda korruptive të qeverisë së tij, që ka dërguar pas hekurave Lefter Kokën dhe Alqi Bllakon.
“Unë jam shumë krenar që i kemi bërë ato vepra, kanë ndikuar”, tha Rama kur u pyet për pamjet e djeshme nga takimi përmbyllës i fushatës në Elbasan, por ndryshoi “çehre” sapo i kujtuan se për Inceneratorin ndodhet në burg ish-ministri i tij i Mjedisit.
I pyetur pikërisht për rrjedhën e hetimeve dhe gjykimit të dosjes së aferës 420 milionë euro të inceneratorëve, Rama refuzoi të merrte përsipër përgjegjësinë në lidhje me zyrtarët socialistë që akuzohen për korrupsion e shpërdorim detyre.
Sipas tezës me të cilën shefi i qeverisë përpiqet të nxjerrë të larë veten, Lefter Koka, por edhe Arben Ahmetaj siç ai la të nënkuptuar kur iu përmend emri i ish/zv-kryeministrit kanë hedhur firma e lidhur kontrata konçesionare dujke bërë “me kokën e tyre”, pas shpinës së tij.
“Kjo është çështje e drejtësisë. Unë nuk lëshoj askënd. Kush e lëshon veten dhe ngatërron rrugën dhe del nga rruga e Zotit, nuk ka asnjë shans të mbahet pas shkopit të flamurit të PS dhe pas meje. Unë nuk i mbroj por jam marrë personalisht dhe kam udhëhequr reformën në drejtësi që ata të mos mbrohen”, tha Rama.
PJESË NGA INTERVISTA:
Ka diçka që do të bënit ndryshe në lidhje me inceneratorët?
Edi Rama: Jo mo fare, unë mendoj që ato janë vepra të një rëndësi të veçantë që kanë ndryshuar tërësisht të sotmen dhe të këtyre zonave që ishin të detyruara të bashkëjetonin me vatra kanceri dhe sot i administrojnë mbetjet në një nivel të lartë. Unë jam shumë krenar që i kemi bërë ato vepra, kanë ndikuar.
Krenar dhe për Lefter Kokën?
Edi Rama: Mos e banalizo muhabetin tani…
Ka qenë deputeti juaj, e morët me shumë bujë!
Edi Rama: Kushdo që ka marrë pjesë në ndërtimin e atyre veprave dhe ka përfituar pas kurrizit tonë të shkojë aty ku s’thuhet, të merret me drejtësinë. Kjo është çështje e drejtësisë.
Siç i merrni dhe i lëshoni?
Edi Rama: Unë nuk lëshoj askënd, kush del nga rruga e Zotit dhe e ligjit, le të shkojë e të merret me drejtësinë.
Nuk ka asnjë shans të mbahet pas shkopit të flamurit të PS dhe pas meje. Unë nuk i mbroj por jam marrë personalisht dhe kam udhëhequr reformën në drejtësi që ata të mos mbrohen.
Përgjegjësi ndjeni? Morale, politike?
Nuk ndjej. Përgjegjësia është individuale dhe ne jetojmë në demokraci. Nuk i kaloj në sallë toruture që të kuptoj se ta në të ardhmen do të çmenden.
