Automjeti i kryebashkiakut të Hasit, Beqir Mulaj është përfshirë nga flakët gjatë natës.
Sipas raportimeve mediatike, në momentin që ndodhi ngjarja, automjeti i kandidatit të PS-së në Has ishte i parkuar në garazhin e banesës.
Forcat zjarrfikëse kanë bërë të mundur shuarjen e flakëve.
Një hetim ka nisur për zbardhjen e shkaqeve të ngjarjes.
“Rreth orës 00:04, salla operative e Komisariatit të Policisë Has është njoftuar se ka rënë zjarr në garazhin në pronësi të shtetasit B.M., në aksin rrugor ‘Krume-Golaj’. Shërbimet e Policisë dhe ato zjarrfikëse kanë shkuar menjëherë në vendngjarje, ku është bërë i mundur neutralizimi i flakëve, me qëllim mospërhapjen e zjarrit. Si pasojë e flakëve, është djegur plotësisht automjeti në pronësi të shtetasit B.M. Grupi hetimor, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Kukës, vijon veprimet hetimore, me qëllim përcaktimin e shkakut të rënies së zjarrit”, njoftoi policia.
Burime policore thanë se paraprakisht ngjarja dyshohet aksidentale.
Vetë Mulaj tha se nuk ka dyshime se ngjarja është e qëllimshme.
“Kjo gjë përkoi me fushatën elektorale. Unë jam kandidat për kryetar bashkie. Por realisht nuk kam dyshime. Nuk mund ta vë gishtin. Nuk mund ta them këtë. Policia ka ardhur, ekspertët janë këtu. Unë kam besim te autoritet që të zbardhet shkaku i zjarrit,” tha ai ndër të tjera, për mediat.
