Tekniku i Teutës, Edi Martini dha prononcimin e tij pas eliminimit në gjysmëfinalen e Kupës së Shqipërisë.
Martini uroi klubin e Tiranës për kualifikimin, ndërsa theksoi se rezultati i ndeshjes së parë (3-0) ishte shumë për skuadrën e tij që ta kapërcente.
“Ndeshja e parë ndikoi në anën psikologjike, aq më tepër të përmbysësh atë rezultat përballë Tiranës. Edhe gjendja fizike ka qenë e ngarkuar, pasi me këtë grup lojtarësh kemi luajtur këtë periudhë. E dinim që përmbysja do të ishte e vështirë dhe rezultati i kësaj ndeshjeje nuk ndikon për sfidat e kampionatit. Janë edhe 4 ndeshje në kampionat dhe ne pretendojmë që të sigurojmë një vend në Kupat e Europës.
Skuadra po bën mirë dhe jemi optimistë për të arritur këtë objektiv. Do bëjmë të pamundurën që të arrijmë vendin e katërt. Kalendari është i vështirë, do të bëjmë maksimumin dhe shpresojmë që tia dalim. Sfida e radhës në Shkodër është shumë e vështirë, por ne do të synojmë deri në fund Europën. I uroj Tiranës që të fitojë Kupën” – tha ai.
