Koalicioni “Bashkë Fitojmë” mbrëmjen e sotme denoncoi një akt të paprecedentë dhunë në prag të zgjedhjeve parlamentare të 14 Majit, ndaj 4 aktivistëve demokratë në zonën e Fushë-Arrëzit.
Sipas denoncimit drejtori i HEC-it të Fierzës, Vasil Musliu dhe një grup personash që prej disa ditëve qarkullojnë të armatosur në zonë duke u bërë presion qytetarëve për vota, kanë goditur me qytë pistolete pas koke aktivistët e PD.
“Në fshatin Mzi, Njësia Administrative Fierzë e Bashkisë Fushë Arrëz, një bande e armatosur me në krye Drejtorin e HEC-it Fierzë, kriminelin elektoral Vasil Muslija me të birin dhe shtetasin Zamir Sadiku, kanë ushtruar dhunë me armë kundër katër aktivistëve të Partisë Demokratike. Të tre banditët me spaleta pushteti, përfaqësues të PS-së së Pukës, pasi i kanë ndaluar në rrugë makinën ku ishin Besmir Nika, Bledar Nika, Ndue Deda dhe Ridvan Kuka, veprimtarë të opozitës i kanë qëlluar me qyta armësh pistoletë. Sipas raportimeve nga terreni, nga spitali dhe nga përfaqësues të koalicionit “Bashkë Fitojmë” në Pukë, si pasojë e dhunës ka mbetur i plagosur rëndë shtetasi Besmir Nika, dhe me plagë më të lehta vëllai i tij, Bledari. Të tre personat dhunues, sipas raportimeve, gjatë gjithë këtyre ditëve kanë qarkulluar në zonë të armatosur dhe duke ushtruar presion e shantazh ndaj banorëve”, thuhej në deklaratën e “Bashkë Fitojmë”.
Opozita akuzonte më pas drejtëpëdrejtë kryebashkiakun e Pukës, Gjon Gjonaj se përmes personave me precedentë penalë të lidhur me PS, por ushtron dhunë dhe presion nga Gomsiqja deri në Fierzë, pasi është në panik nga humbja që e pret më 14 Maj.
Lidhur më ngjarjen dhe denoncimin e demokratëve, ka reaguar edhe policia e shtetit, me autoritetet që pavarësisht se kanë në spital 2 persona të plagosur rëndë dhe dëshmitë e tyre, e kanë cilësuar ngjarjen një sherr momental të ndodhur në aksin rrugor rural Miliska-Dardhë.
REAGIMI I POLICISE:
Pukë/Informacion paraprak
Policia ka marrë njoftim se në aksin rrugor rural Miliska-Dardhë, në vendin e quajtur “Lumi i Mziut”, kishte ndodhur një konflikt mes disa shtetasve.
Nga deklarimi i dhënë nga shtetasi B. N., (i dëmtuar), dyshohet se:
Shtetasi V. M., së bashku me djalin e tij, shtetasin R. M., dhe shtetasin S. S., banues në fshatin Fierzë, gjatë një konflikti të çastit, për motive të dobëta, dyshohet se kanë goditur me grushte dhe me sende të forta, shtetasin B. N.
Shtetasi B. N., si pasojë e konfliktit është dëmtuar lehtë, dhe pas ndihmës mjekësore në Spitalin Rajonal Shkodër, ka dhënë deklarim në Drejtorinë Vendore të Policisë Shkodër.
Shërbimet e Policisë kanë shoqëruar në Komisariatin e Policisë Pukë, autorët e dyshuar, shtetasit V. M., R. M., dhe S. S., dhe nën drejtimin e Prokurorisë po kryhen veprime procedurale.
Vijojnë veprimet hetimore për sqarimin e plotë të rrethanave të ngjarjes.
LEXO EDHE:
Tensione në Fushë Arrëz/ Grupi i armatosur i zyrtarit të PS dhunon me qyta pistolete 4 demokratë
