Gazetari i ‘AFP’, Arman Soldin është vrarë në krye të detyrës në Ukrainë. Mediat e huaja raportojnë se ngjarja ka ndodhur rreth orës 16:30 në zonën e quajtur Chasiv Yar në lindje të Ukrainës, ku forcat ruse kanë sulmuar me raketa.
Ekipi i AFP-së u sulmua me raketa Grad ndërsa ishin me një grup ushtarësh ukrainas. Soldin, 32 vjeç, u vra kur një raketë goditi afër vendit ku ai ishte shtrirë. Pjesa tjetër e ekipit ishte e padëmtuar.
I lindur në Sarajevë, Soldin ishte një shtetas francez. Ai filloi të punojë për AFP si praktikant në zyrën e saj në Romë në 2015 dhe më vonë u punësua në Londër. Ai ishte pjesë e ekipit të parë të AFP-së që u dërgua në Ukrainë pas fillimit të pushtimit rus më 24 shkurt 2022, duke mbërritur të nesërmen. Soldin kishte jetuar në Ukrainë që nga shtatori, duke udhëhequr mbulimin e ekipit dhe duke udhëtuar rregullisht në vijat e frontit në lindje dhe jug.
