Qerim Gjepali është 24-vjeçari me origjinë shqiptare, i cili humbi jetën në aksidentin rrugor të ndodhur mbrëmjen e së dielës në në Imola të Italisë. Sipas mediave lokale, ngjarja ndodhi rreth orës 23:00, kur i riu ndodhej në një makinë “Mercedes CLK” në shoqërinë e dy shokëve. Mjeti, që drejtohej nga një 21-vjeçar shqiptar u përplas dhunshëm me një pemë.
Për pasojë, 24-vjeçari Gjepali i cili ishte ulur në sediljen e përparme, humbi jetën.
Dy personat e tjerë që ndodheshin në makinë mbetën të plagosur, por jo në gjendje të rëndë. I riu që drejtonte makinën u transportua me helikopter në spitalin Maggiore në Bolonja, jashtë rrezikut për jetën. Pasagjeri tjetër, një 23-vjeçar u dërgua në urgjencë.
Gjepali jetonte në Itali, bashkë me familjen.
“Ai jetonte në qendër, por unë nuk e njihja drejtpërdrejt”, komenton kryebashkiaku i Massa Lombarda, Daniele Bassi. “Kur dëgjova lajmin u trondita, sepse këto janë ngjarje që nuk do të donte t’i dëgjonte kurrë, sidomos kur kanë të bëjnë me një djalë kaq të ri. I shpreh he ngushëllime të përzemërta në emër timin, administratës bashkiake dhe mbarë qytetit familjes në një moment kaq të trishtë për ta”, shtoi më tej ai.
