Trajneri i Partizanit, Xhovani Colella, foli pas fitores me shifrat 3-1 ndaj Kukësit.
Italiani e konsideron një javë tejet pozitive, edhe për faktin se Tirana humbi dhe diferenca shkurtohet në 2 pikë. Në prag të derbit, Colella tha se të kuqtë presin një sfidë të vështirë pavarësisht disa mungesave në kampin kundërshtar.
Fituat, si dhe Tirana humbi dhe vjen e përgjysmuar në derbi. Mund të themi se kjo javë shkoi në perfeksion për ju?
Sigurisht që po. E para është pozitive, sepse ne fituam, kjo është më e rëndësishmja. Më pas vjen pjesa tjetër që kemi ngushtuar diferencën me Tiranën. Sa u përket mungesave të tyre, nuk më intereson, sepse derbi është gjithnjë i fortë dhe nuk pres një ndeshje të lehtë.
Ashtu si Tirana, edhe ju kishit 4 lojtarë që rrezikonin për kartonë të verdhë. Si e menaxhuat që nuk u ndëshkua askush?
Nuk kam menduar ta menaxhoj këtë situatë. Kam menduar vetëm që të fitojmë sot. E para, sepse të bësh llogari mund të të çojë edhe në gabim. E dyta, kam lojtarë mjaft të zotë, të cilët po bëjnë gjërat e duhura dhe po stërviten si duhet.
Duhet të jap edhe shembullin, që Menish zëvendësoi Sotën sot. Ai edhe pse kishte pak minuta në këmbë, arriti të jepte më të mirën dhe kjo është ajo që më kënaq. Nuk e kam problem nëse më mungon një lojtar ose jo, sepse edhe ata që aktivizohen japin maksimumin.
Pas gjithë asaj që ndodhi në stadiumin “Arena e Demave” dhe në “Niko Dovana” të Durrësit, ju bën të ndiheni favoritë në derbi?
Jo, nuk ka asnjë favorit. Ne në Itali themi gjithnjë që kjo ndeshje i ka të tria rezultatet brenda. Kjo përballje mund të prodhojë gjithçka.
Në dy ndeshjet e fundit keni startuar me skemën 3-5-2 dhe keni fituar. E keni gjetur rreshtimin ideal tashmë?
Në minutat e fundit e ndryshuam skemën dhe nisëm të luajmë 4-3- 3 dhe mendoj se janë gjëra që ne i përdorim gjatë lojës. Ka momente, që ne perfeksionojmë këtë skemë, por në ndeshje të tjera, mund të shfaqemi po aq mirë edhe me një tjetër rreshtim.
Cili nga lojtarët e afruar në merkaton e janarit ju ka bindur më shumë në paraqitjet e deritanishme?
Nuk dua të veçoj asnjë, pasi të gjithë lojtarët e afruar në janar po bëjnë gjithçka mirë. Më vjen shumë keq për Selmanin, që iu desh të mbyllte sezonin. Për pjesën tjetër po ecën gjithçka siç e kishim menduar.
