Kthimi i Durrësit në pikën më të rëndësishme turistike në vend është prioriteti kryesor në programin e kandidatit të koalicionit “Bashkë Fitojmë”, Igli Cara, i cili do të garojë më 14 majë përballë kandidates socialiste, Emiriana Sako.
I ftuar në emisionin “Publikisht” në RTSH, Cara u ndal edhe te disa problematika në qytet, teksa përmendi infrastrukturën, mungesën e ujit të pijshëm, apo edhe rindërtimin që, sikurse u shpreh ai, jo vetëm që nuk ka përfunduar në kohë si proces, por ka probleme edhe me cilësinë e ndërtimeve.
“Prioritet është që të kthehet Durrësi në polin më të rëndësishëm turistik në vend dhe të ketë hapësira dhe mundësi për të gjithë qytetarët dhe duhet me qenë pranë tyre dhe sidomos për problemet sociale, sepse Durrësi duke qenë qytet i madh ka edhe shumë problematika sociale. Durrësi ka një infrastrukturë që lë shumë për të dëshiruar, kemi mungesë të ujit të pijshëm. Plaga më e re në qytetin e Durrësit ishte tërmeti dhe rindërtimi dhe edhe sepse u premtua që do përfundonte në mars të 2022, ka kaluar një vit dhe ende është shumë mbrapa. Kemi probleme jo vetëm në cilësi. Kemi familje që nuk janë sistemuar dhe kanë shumë probleme. Po ashtu ka probleme me transparencën dhe menaxhimin e taksave. Ka diferencime ku bëhen investimet e mëdha”, tha ai.
Edhe pse maxhoranca socialiste e konsideron Portin e ri të Durrësit si një projekt me rëndësi të madhe jo vetëm për qytetin bregdetar, por të gjithë Shqipërinë, për Carën ky projekt ka një sërë problematikash.
“Për Portin e Marinës e kam thënë që në vitin 2020, kam kundërshtuar mënyrën si është bërë, është bërë pa garë pa konkurrim. Pastaj pasi u pasuruam me të dhënat dua të them që do isha pro një Marine Detare, por ky që flasim, këto kalatat e vogla nuk e kalojnë vlerën 20 mln euro që do të thotë në një vlerë 2.1 mld euro, porti Marinë që përdoret si kopertuar është vetëm 1% e vlerës dhe gjithë pjesa tjetër e ndërtimit janë 13 mijë apartamentet. Po humbim një pasuri 3 mld euro që është Porti i Durrësit, nuk e kemi më, humbje kombëtare kjo. Dhe po flasim për përfitim 2.1 mld euro. Me ç’të drejtë ky porti i ri përjashtohet nga taksa e infrastrukturës dhe e strehimit që janë 11% të dyja që i takojnë qytetit të Durrësit”, tha ai në “Publikisht”.