Një ngarkesë rekord prej 4.2 ton kokainë, e nisur nga Kolumbia, është sekuestruar nga policia portugeze të martën.
Lënda narkotike ishte fshehur brenda një ngarkese me banane dhe vlerësohet se mund të sillte fitime në mbi 100 milionë dollarë. Kokaina e pastër ishte fshehur mes gjashtë paletave me banane që kishin mbërritur në portin Setubal.
Operacioni është një ndër më të mëdhenjtë në kapjen e drogës në vend, në vitet e fundit.
Megjithëse nuk është bërë asnjë arrestim, Koordinatori i Policisë Vitor Ananias tha se sekuestrimi nënkupton një “goditje të rëndë financiare” për organizatën kriminale të përfshirë.
Ananias tha se banda e dyshuar është e njohur për autoritetet. Sekuestrimi erdhi si rezultat i mbledhjes intensive të informacionit nga policia portugeze në bashkëpunim me partnerët ndërkombëtarë.
Kapja më e madhe e drogës në Portugali këtë vit vjen pas kapjes së kokainës në vlerë prej më shumë se 400 milionë dollarësh nga autoritetet italiane javën e kaluar, një nga konfiskimet më të mëdha të vendit në dekada.
Në Spanjë, policia çmontoi gjithashtu laboratorin më të madh të kokainës në Evropë muajin e kaluar, pasi punoi së bashku me autoritetet nga Portugalia dhe Kolumbia.
