Kryetari i PD-së, Sali Berisha denoncoi këtë të mërkurë përpjekjet që sipas tij po bën mazhoranca për blerjen e votave për lokalet e 14 Majit.
Në një takim elektoral nga Përrenjasi, Berisha tha se zëvendësministrja Belinda Balluku, të cilës iu referua si Belina Lluksi, ka shpërndarë ditët e fundit 4 mld pagesa paaftësie në Qarkun e Dibrës.
“Janë lëshuar si lukuni, si kriminelë elektoralë, duke blerë vota. Në krye të kësaj përpjekje qëndron Belina Lluksi. Se mbesa e Beqir Ballukut thuhet se u thotë shoqeve të veta ‘mua më pëlqen luksi dhe do më thërrisni Belina lluksi’. Po kur ndodhi kjo? Kur shpenzoi 220 mijë euro për luksin e zyrës. Kur porosiste biftekun 1000 dollarë. Vetëm këtë javë ka shpërndarë Belina lluksi 400 mln lekë të reja pagesa paaftësie në qarkun e Dibrës”, tha Berisha.
Më vonë gjatë ditës, në një emision televiziv, Berisha tha se të shifrat për të cilat flet i ka marrë nga të dhënat zyrtare nga Thesari i Ministrisë së Financave dhe Ekonomisë.
Gjatë takimit në Përrenjas, kryedemokrati deklaroi se kandidatët e mazhorancës si kryebashkiakë për lokalet e 14 Majit “i kanë xhepat të mbushur me paratë e vjedhura nga ju”.
Ndërsa kreun e qeverisë Edi Rama e quajti hajdutin më të madh që ka njohur ndonjëherë toka shqiptare.
Berisha u ndal te pasuria e Ramës dhe tha se ai u ka dhënë qindra tendera familjarëve të vetë.
“Edi Rama duhet të dalë bashkë me mua këtu në shesh, duhet të dalë para jush, duhet ti kthejë xhepat, por Edi Rama nuk i kthen xhepat, nuk del dot kurrë të përballet me Sali Berishën sepse jeton në saraje me 5 mijë metra katrorë oborrin. Jeton në saraje me 570 metër gjatësinë e themeleve, jeton në sarajet e ndërtuara me materialet më të kushtueshme në një kohë kur kishte të deklaruara pasuri 3900 euro dhe 400 mijë lekë. Nuk del dot sepse u akuzua me raport nga OSBE-ja në vitin 2014, sepse ke fshehur offshore 200 milionë euro. Nuk guxoi ti thotë një fjalë. Nuk del dot”, tha kryedmeokrati.
“Ai ka familjarë dhe unë kam familjar. Dhe po të vijë ai para jush, unë nga kjo librari dixhitale unë nxjerr dokumentet jo të dhjetëra, por qindra tenderave të familjarëve të tij. Të baxhanakut, Armando Frangut, të thjeshtrës, kushërinjve, etj., etj., me radhë. Sali Berishën e kontrolloi e gjithë bota dhe gjeti turpin e atyre që e akuzuan. Nuk gjeti asgjë. Nuk del dot. Ndaj dhe ndryshimi në 14 është nga më të mëdhenjtë që ka ndodhur ndonjëherë. Përdorni votën për të shënuar një ndryshim cilësor, me të cilin ju garantoj se krahas vendosjes së Suzanës në shtëpinë e parë, si qytetarë të parë, keni vendosur veten tuaj si qytetar të parë të asaj shtëpie. Keni votuar për veten tuaj, për hallet problemet, keni votuar për ndryshimin e jetës tuaj”, shtoi ai.
