Kryedemokrati Sali Berisha është ndalur këtë fundjavë në Veri të vendit, aty ku ka prezantuar disa nga kandidatët për kryebashkiakë të koalicionit “Bashkë Fitojmë” për zgjedhjet locale të 14 majit.
Mbrëmjen e sotme Berisha ndodhej në Vaun e Dejës, aty ku fushata nisi me një ngjarje të rëndë pak javë më parë, kur u hodh në erë me tritol makina “Audi” në banesën e kreut të degës së PD-së, Benard Ndreca.
Para se të niste prezantimin e ish-deputetit Zef Hila për bashkinë, Berisha u ndal te atentati ndaj Ndrecës, duke thënë se ata që tentuan t’a asgjësonin apo t’a mposhtin moralisht, morën me vete turpin.
“I dashur Benard Ndreca, heroi i gjallë i votës së lirë. Atentati ndaj teje ishte ndaj mabrë popullit opozitar, i cili është i vendosur të përmbysë monizmin në 14 maj. Ata që menduan se mund të asgjësonin fizikisht ose të të mposhtnin moralisht, morën turpin e historisë. Kurse ti udhëheq, prinë Partisë Demokratike drejt fitores së Zef Hilës në këtë bashki”, tha Berisha.
Më tej lideri i opozitës nënvizoi se kryeministri Edi Rama ka instaluar në vend diktaturën e hajdutëve dhe për këtë do të ndëshkohet masivisht me votë në maj, pasi për shqiptarët po vjen ndryshimi i madh.
“Hajmeli dhe Vau i Dejës dhe në tërësi, që i njeh më mirë se kushdo tjetër se çdo të thotë pushtet në duart e një njeriu. Pushtet në duart e një njeriu është faktuar në histori, dhe më shumë se tek kushdo tjetër në kurrizin e shqiptarëve, të haljmelasve si forma më e egër, çnjerëzore e pushtetit.
Pushteti i një njeriu ekziston në diktaturat komuniste, që bazohen në ideologjitë njerëzore marksiste-leliniste dhe ne e përjetuam atë. Bazohen në diktaturat ushtarake, ku junta kolonelësh apo ushtarakësh marrin pushtetin dhe me ligje ushtarake ushtrojnë pushtetin e tyre mbi qytetarët.
Por do ju them sonte këtu, se mes të gjitha formave të diktaturave, studiuesit, historianët e mëdhenj, formën më të keqe, më të egër konsiderojnë diktaturën e bandave, banditit. Dhe kjo diktaturë është sot realitet në Shqipëri”, nënvizoi ai.
