Për kryedemokratin Sali Berisha, kandidati socialist për bashkinë e Shkodrës, Benet Beci, ka bërë gabimin e jetës kur ka pranuar propozimin e Edi Ramës që të kandidojë në kryeqendrën e Veriut të vendit.
Nga Vau Dejës ku mbrëmjen e sotme prezantoi Zef Hilën si kandidat, Berisha nuk kishte si të mos ndalej te Beci, pas mesazheve që Edi Rama i drejtoi nga pedonalja gjatë pasdites, kur prezantoi ish-drejtorin e Fondit Shqiptar të Zhvillimit si kandidat për kryebashkiak.
Berisha nënvizoi se Beci ia ka falur veten dreqit, duke iu referuar kryeministrit, pasi Rama – deklaroi Berisha – është armiku i tretë i Shkodrës dhe zonave të saj.
Ish-kryeministri vlerësoi kandidatin Zef Hila për Vaun e Dejës, ndërsa për Benet Becin tha se si deputet në Kuvend nuk e ngriti kurrë zërin për problematikat e qarkut dhe qytetit, ndërsa si kandidat u paraqiti shkodranëve një projekt 3D të Ramës.
“Ftoj çdo qytetar të qarkut Shkodër, të ndalet këto dy vite, të kujtojë parlamentin shqiptar, sa herë Zef Hila dhe deputetë të tjerë kanë ngritur zërin për qytetarët e Shkodrës. Po sa herë Benet Beci ka folur për qytetarët e Shkodrës? Asnjëherë.
Unë e njoh ate, ai ka bërë gabimin fatal të jetës së tij, të paraqitet për të përfaqësuar armikun kryesore të Shkodrës, Edi Ramën. Tre armiq kanë pasur këto zona, Car Dushanin, Enver HGoxhën dhe Edi Ramën.
Benet, Zef Hila sic e dëgjove numëroi me qindra projekte. Kurse ti shkove në Shkodër me maketin 3D të hyrjes së Shkodrës të Edi Ramës. Po kishte turp më të madhe se ajo?! Beneti ja fali veten dreqit duke pranuar të kandidatojë për Ramën” , tha Berisha.
