Koalicioni opozitar “Bashkë Fitojmë” ka vijuar të denoncojë edhe sot skandalin me tenderat në bashkinë e Tiranës, nga të cilat ka përfituar kreu i IMT-së Marliglen Qato dhe bashkëpunëtorët e tij të ngushtë në kohën kur drejtonte Ujësjellësin e Tiranës.
Sagën e denoncimeve e nisi dy ditë më parë kandidati opozitar në zgjedhjet e 14 majit, Belind Këlliçi, që zbuloi skemën përmes së cilës Mariglen Qato së bashku me familjarët e tij ka përfituar 25 milionë euro nga tenderat dhe leje ndërtimi të dhëna nga Erion Veliaj.
Qato ka shfrytëzuar pozicionin e tij në kupolën e administratës për t’u pasuruar frikshëm nën menaxhimin e bashkisë prej Veliajt, me kompaninë “5D” që është në qendër të skemës dhe zotërohet “de facto” prej drejtorit të IMT-së.
“Hoteli 15 milionë euro po ndërtohet në Durrës dhe bëhet fjalë për një treshe që dikur ka drejtuar UKT. Tre titullarë të UKT që kanë lënë Tiranën pa ujë. 15 milionë euro me sipërmarrës ‘Mediterrinan Investment Group’ dhe subjekt ndërtues 5 drejtorët e Bashkisë, ‘5D’ të cilat ky individ së bashku me Redi Mollën dhe Elvin Tivarin, dy bashkëpunëtorët e tij të ngushtë dikur në UKT dhe tashmë ata janë punonjës të ‘Tirana DC’. Veliaj ka thënë në 2015 që Tirana brenda 2022 do të kishte ujë me kualitetin e Korçës dhe çmimin e Bathores. Ujë qytetarët nuk kanë. Qytetarët nuk kanë 24 orë në muaj ujë.
Titullarët e UKT janë ndërtues, biznesmenë, ndërtojnë hotele 15 milionë euro. Hapin kompani, ua japin familjarëve të tyre, familjarët e tyre i kanë drejtorë financash në UKT, i kanë të punësuar në bashkinë qendrore, kontrollojnë fondet. Mariglen Qato ka marrë 29 tendera. Ky drejtor i bashkisë Tiranë 10 tendera i ka marrë nga UKT ku ka qenë drejtues vetë, ndërsa nga bashkia Tiranë ka marrë 15 tendera të tjerë. Së bashku bëjnë 20 milionë euro. Do t’i dërgoj në SPAK dhe pse nuk kam shpresë”, tha Këlliçi.
Në bazë të denoncimeve të Këlliçit, edhe lideri i opozitës Sali Berisha në konferencën e përjavshme me gazetarët që zhvilloi këtë të premte, akuzoi Qaton se ka përfituar 29 tendera dhe miliona euro nga paratë e taksapaguesve shqiptarë, të cilat i ndan me Erion Veliajn.
“Erion Veliaj është bërë, siç e thashë më sipër në rrjetet sociale, simboli i neverisë së kryeqytetit. Ndaj dhe lutja ime për gazetarët është, mos harxhoni kohë me këtë njeri, i cili nuk takon qytetarët, bën fushatë vetëm me drejtorët e bashkisë. Një skandal i madh ka shpërthyer këto ditë. Është gjetur se drejtorët e tij, Mariglen Qato, Elizabeta Cjapi e të tjerë, janë hajdutë të paskrupullt në tendera. Kanë fituar në kundërshtim me ligjet me familjarët e tyre, 29 tendera. Kanë fituar 25 milionë euro tendera”, tha Berisha.
“Se mos kujtoni se janë të drejtorëve këto, ato janë të Veliajt”, tha Berisha duke sqaruar skemën e përfitimit nëpërmjet tenderave dhe lejeve të ndëritmit të pamerituara, në kryeqytet.
“Këtu kam ndërtesat që ndërton Veliaj me emrat e drejtorëve. Se nuk ka mundësi kurrë që një kryetar bashkie të shkelmojë ligjin e konfliktit të interesit, e shkelmon kur është vetë pronar, kur është vetë ndërtues. Problemi është se ka edhe hotel 15 milionë euro, pastaj kompanitë shkojnë i regjistrojnë në emrin e një punëtori të vjehrrit. Se shteti nuk ekziston”, nënvizoi ish-kryeministri.
Më tej Berisha e bëri të qartë se në rast fitoreje të opozitës në zgjedhjet lokale, Veliaj do të duhet të japë llogari para prokurorëve në SPAK së bashku me drejtorët e tij, të shndërruar në milionerë.
“Ky është një superskandal, ndaj Erion Veliaj e ka të qartë se me datë 14 merr valixhet dhe shkon në SKAP. Se dosjet i ka aty. Ka dosje të tmerrshme, edhe për djegësin e Tiranës”, deklaroi Berisha.
LEXO EDHE:
Kreu i INUV Mariglen Qato, 25 milion euro tendera dhe leje ndërtimi nga Veliaj
“Mariglen Qato dhe dy drejtues të UKT po ndërtojnë hotel 15 mln euro në Durrës”
