Rezultati për tre bashkitë ku në zgjedhjet e 14 Majit do të aplikohet teknologjia me votim dhe numërim elektronik, pritet që të shpallet nga Komisioni Qendror i Zgjedhjeve vetëm 2 orë pas mbylljes së qendrave të votimit.
KQZ miratoi sot procedurat që do të ndiqen në votimin dhe numërimin elektronik, duke bërë me dije se qytetarët në Elbasan, Vorë dhe Kamëz deri në orën 21:00 të mbrëmjes do të kenë mësuar emrin e kryebashkiakut që do t’i drejtojë në 4 vitet e ardhshme.
Ndërkohë, është sqaruar gjithashtu se numri i votave për çdo kandidat për kryetar dhe këshill do të shpallet në Tiranë, në selinë e KQZ.
Në seancën e së mërkurës Celibashi vendosi të shtyjë sërish vendimin për banerat e PS, por dhe për masat mbi shkelje të denoncuara.
“Në lidhje me këtë natyrë çështjeje, ne dje morëm vendim që të detyrojmë brenda një afati 2 ditor të gjitha subjektet që të vendosin shënimin që tregon se përgjegjësia e kujt është për prodhimin dhe dhe vendosjen e këtyre materialeve propagandistike.
Dhe ndërkohë, iu kemi dërguar kryetarëve të bashkive një shkresë që do duhet ta kuptojnë ndryshe urdhërimin e Kodit Zgjedhor për caktimin e vendeve se ku do të vendosen propagandistike.
Do duhet të caktohen fizikisht dhe konkretisht, do të duhet të vendosin shpjegimet që u dhanë këtu në seancë dhe dokumentacionin që deri më tani zotëron KQZ për denoncimet e bëra, por edhe për gjetjet që kemi bërë ne si institucion”, u shpreh kryekomisioneri.
Gjatë fashës kohore nga data 14 deri më 20 Prill në KQZ janë raportuar rreth 209 aktivitete nga 41 institucione ku 37 prej tyre janë raportuar si të ndaluara.
