Një nga personat në kërkim për vrasjen e Ardian Nikulajt është Edmond Haxhia, me shtetësi shqiptare dhe britanike.
Ai është djali i dajës së Elton dhe Klodian Lestakaj, të cilët 7-vite më parë akuzonin Ardian Nikulaj dhe Arben Nikulajn për vrasjen e dy familjarëve të tyre.
Në një emision televiziv katër ditë më parë, ata mohuan çdo lidhje me vrasjen.
“Nuk kemi çfarë themi më shumë nga ajo ç’ka kemi kërkuar 7 vite më parë, aq më tepër që s’duam të ngjallim emocione negative në këtë rast të freskët. Edhe pse ngjarja ka ndodhur e nuk kemi përgjegjësi, ne sërish do kërkojmë sërish hetim të ngjarjes deri në fund. Nëse shteti shqiptar na garanton jetën me status dëshmitarësh, ne vijmë e përballemi në gjykata. S’kemi dashur kurrë gjak, as nuk duam, duam drejtësi në dosje. Nëse shteti shqiptar na thërrret për hetim ne vijmë menjëherë”, deklaruan ata.
Megjithatë, sipas hetimeve, ekzekutimi ka ndodhur për motive gjakmarrje, në vazhdën e konfliktit mes dy fiseve.
