Nga Boldnews.al
Në një kohë që Prokuroria e Tiranës ka avancuar me hetimin penal ndaj “Salillari-t” për ndërtim të paligjshëm të një godine në zonën e Liqenit të Thatë, kompania në pronësi të Pëllumb Salillarit ka vendosur të zhvillojë një betejë gjyqësore me kryeministrin Edi Rama, i cili, në cilësinë e kryetarit të Këshillit Kombëtar të Territorit (KKT), nënshkroi në nëntor 2022 konfiskimin e pallatit, për shkak të shkeljes së lejes së ndërtimit.
Gjykata Administrative e Apelit ka regjistruar në 18 Prill 2023 padinë e Salillarit për “Shfuqizimin e vendimit nr. 7, dt. 9.11.2022 të KKT-së për konfiskimin për interes publik të objektit; Godinë Banimi dhe shërbimi 2, 4 dhe 6 kat, me 2 dhe 5 kat nëntokë, me vendondodhje Liqeni i Thatë.
Përballja në një proces ligjor mund të duket si një situatë normale, ku një kompani private pretendon veprime abuzive nga institucionet shtetërore.
Por, një përballje ndërmjet Ramës dhe biznesmenit, ndër më të afërtit e tij, krijon hapësirë aludimi se gjithçka mund të jetë një proces me nota fiktiviteti.
Në shtator të vitit 2022, Ministri i Brendshëm, Bledi Çuçi, deklaroi se ishin konstatuar kate pa leje në godinën në ndërtim të Salillarit tek Liqeni i Thatë.
Pas këtij konstatimi, Inspektorati Ndërtimor Urbanistik Kombëtar (IKMT) dorëzoi një kallëzim penal në Prokurorinë e Tiranës ndaj kompanisë “Salillari” për “ndërtim të paligjshëm”.
Paralelisht, Këshilli i Rregullimit të Territorit (KRRT) ndërmori hapat për konfiskimin e godinës, bazuar në një Vendim të shumëdebatuar të Këshillit të Ministrave, të miratuar në Korrik të vitit të kaluar.
Por, ndërkohë që zhvilloheshin këto procedura, kompania “Salillari” vijonte të merrte pa ndërprerje përfitimin e miliardave nga tenderat publikë.
Vetëm pak ditë pas konstatimit të shkeljes ligjore, kompania “Salillari” fiton një tender pa garë, me vlerë 2.5 milionë euro, për thellimin e portit të Vlorës, për t’i krijuar akses dy anijeve nga Bangladeshi, të cilat u pajtuan nga qeveria e Edi Ramës për prodhimin e energjisë elektrike.
Po ashtu, kompania “Salillari” ka fituar të paktën 10 procedura prokurorimi për “asfalt elektoral” të zhvilluar nga Bashkia e Tiranës në dy muajt e fundit.
Institucioni i drejtuar nga Erion Veliaj e ka shpallur kompaninë e Pëllumb Salillarin fitues në procedura të prokurimit publik, me një vlerë totale prej rreth 850 mijë euro.
Pra, përtej asaj që u duk në publik si një përplasje Salillari-Rama, paratë publike që fiton biznesmeni nga qeveria dhe bashkitë e drejtuar nga socialistët, tregojnë të kundërtën, pra një raport që vijon të jetë komod mes tyre.
Por atëherë, për çfarë duhet kjo padi e Salillarit kundër Edi Ramës?
Prokuroria e Tiranës, e cila prej disa muajsh po kryen hetim penal për ndërtim të paligjshëm ndaj kompanisë “Salillari”, pritet që shumë shpejt ta dërgojë çështjen për gjykim.
“Boldnews.al” ka mësuar se, të dhënat e siguruara deri më tani nga hetimi penal, krijojnë bindjen se vepra penale është kryer.
Por, në rast se Gjykata e Apelit Administrativ pranon padinë e Salillarit dhe rrëzon konfiskimin, rrjedhimisht edhe faktin e paligjshëm, atëherë një vendim i mundshëm në favor të kompanisë private mund të zbusë efektet e procesit penal.
A është ky qëllimi i padisë së Pëllumb Salillarit kundër “punëdhënësit të tij kryesor”, Edi Ramës? Mbetet për t’u parë në vijim nëse konfirmohen dyshimet për një padi dhe përplasje “fiktive” mes të dyve.
