Në intervistën e përbashkët me partneren e tij, Anna Shkrelin në “Rudina” në Tv Klan, kandidati i Partisë Demokratike për kryetar bashkie, Belind Këlliçi ndau detaje nga fëmijëria. Shkurtimi i emrit të tij vijon ta shoqërojë edhe sot duke qenë kështu një pjesë e rëndësishme e identitetit të Këlliçit. Shpjegimi pas kësaj është fare i thjeshtë, ndonëse ka qenë një prej detajeve që ka tërhequr vëmendje gjatë fushatës së tij.
Anna Shkreli: Belo është një emërtesë të cilën ia kanë vënë qëkur ka qenë i vogël. Është shkurtimi Belind-Belo.
Rudina Magjistari: Që i vogël të kanë thirrur…
Belind Këlliçi: Të them të drejtën, ma kanë vënë çunat e lagjes me ta thënë troç, që të jemi të vërtetë. Ma kanë vënë çunat e lagjes.
Rudina Magjistari: Për t’i rënë shkurt.
Belind Këlliçi: Për t’i rënë shkurt, vëllai im për shembull e ka Reshard, i thonë Redi. Në Tiranë, zakonisht thërrasim shkurtimet.
Këlliçi shpjegon edhe arsyen për të cilën vendosi ta përdorte këtë pseudonim të tij në fushatë.
Belind Këlliçi: Po bëja brainstorming me ekipin tim që më ndihmon, me vullnetarët por kryesisht me forumin rinor. Forumin Rinor të Partisë Demokratike e kam drejtuar për 7 vjet dhe të gjithë më kanë thirrur Belo, nuk më ka thirrur njeri Belind, rrallë më kanë thirrur Belind ose ata që vinin për herë të parë që më takonin. Ishte ideja e tyre që “ore pse mos ta përdorim këtë nickname-n tënd në njëfarë mënyre, ta nxjerrim sepse ne në fakt kështu të njohim të gjithë dhe është më tërheqëse dhe i apelon më shumë të rinjve dhe brezit të ri”. Duke qenë se edhe jam një kandidaturë e re, vij nga të rinjtë dhe kjo duhej të ishte pjesë edhe e kësaj fushate.
