Alessandro Diamanti është larguar nga futbolli i luajtur në moshën 39-vjeçare. Ish-lojtari që ka kontribuar edhe për Përfaqësuesen e Italisë ka njoftuar gjithçka në rrjetet sociale.
Diamanti e mbylli karrierën e tij te Western United, një skuadër australiane për të cilën kishte luajtur që nga viti 2019, me të cilën fitoi edhe një kampionat. Ai do të luajë ndeshjen e tij të fundit kundër Perth Glory të shtunën.
Cilësitë e tij u vunë në pah në kohën kur luante për Livornon, ku shënoi 24 gola dhe dhuroi 13 asiste në dy sezone mes Serisë A dhe B.
Diamanti mbahet mend edhe për kohën në Premier League, në sezonin 2009/2010 mbajti veshur fanellën e West Hamit.
Pas rikthimit në Itali, fillimisht në Brescia, më pas në Bologna, ku jetoi një nga momentet më të mira, duke realizuar 22 gola dhe duke numëruar 24 asiste në 88 paraqitje në total.
Më pas, lojtari në fjalë fluturon për në Kinë, në Guangzhou me trajner Marcello Lippi, me të cilin fiton kampionatin kinez. Më pas radhën e kishte një tjetër rikthim në Itali, te Fiorentina, Palermo, Perugia dhe Livorno. Në fund, ashtu si qershia mbi tortë erdhi përvoja australiane. Playmakeri toskan e mbylli karrierën e tij me 579 paraqitje në total dhe 123 gola të shënuar.
