Misteri i zhdukjes së Fatmir Sulovarit dhe Leonard Thodhorit, është ende i pazbardhur nga policia, ndërsa detaje të reja kanë dalë në dritë.
Sipas informacioneve, dyshohet se të dy këta shtetas janë ekzekutuar në fshatin Vrinë të Bashkisë Konispol ku dhe janë groposur trupat e tyre.
Prej orëve të mëngjesit, rreth 50 familjarë te Fatmir Sulovarit janë nisur drejt kësaj zone për ta krehur fizikisht dhe me mjete logjistike me qëllim gjetjen e trupave.
Ndërkohë kujtojmë se një ditë më parë një automjet tip “Mercedes-Benz” që mendohet se është mjeti me të cilin janë rrëmbyer Leonard Thodhori dhe Fatmir Sulovari është gjetur në një magazinë në afërsi të fshatit Nivicë të Bashkisë Himarë.
Gjatë kontrolleve të ushtruara nga policia dhe Forcat Operacionale bëhet me dije se gjithashtu është sekuestruar një automjet fuoristradë tip “Range Rover” në Qafë-Gjashtë ndërkohë që po verifikohen edhe gjashtë mjete të tjera.
Dyshja u zhdukën më 6 prill. Ata dyshohet të kenë hipur me vullnetin e tyre në një makinë me targa greke të vjedhur në Lezhë, që nënkupton se njiheshin me drejtuesin. Mjeti në fjalë është pikasur nga kamerat në hyrje të Sarandës, por nuk është parë të dalë më nga qyteti.
Burimet policore tregohen shumë të rezervuara në dhënien e informacioneve, ndërsa mungesa e provave konkrete, por kryesisht e trupave, mendohet se është arsyeja pse policia nuk po e konkludon operacionin me arreste.
Megjithatë para Komisariatit të Sarandës është vënë re në orët e para të mëngjesit të sotëm një sasi e konsiderueshme efektivësh e automjetesh, ndoshta për te rinisur operacionin qe prej disa ditësh po zhvillohet në bashkëpunim me Forcat Operacionale të Vlorës.
Kush janë dy personat e zhdukur?
1. Leonard Theodhori, 46 vjeç i njohur si “Koçole”. I dënuar disa here. I dyshuar si pjesëmarrës në Masakrën e Qafë-Gjashtës në vitin 1997 ku u vra oficeri i policisë Gjergj Mehmeti. Në vitin 2003 ka qenë prezent ne automjetin që drejtohej nga Andrea Gjini para se ky i fundit të vriste biznesmenin Jaho Bajo. I arrestuar po atë vit për “moskallezim krimi” lidhur me një ngjarje tjetër të kryer nga Gjini. I arrestuar më pas per “vjedhje” e “mashtrim”. Përdorues i lëndëve narkotike dhe i dyshuar si i perfshirë në trafik lëndësh narkotike.
2. Fatmir Sulovari alias Fatmir Krasniqi, 46 vjeç. I dënuar më parë për “armëmbajtje pa leje” dhe “plagosja e lehtë me dashje”. I arrestuar ne prill 2022 ne Lushnje, pasi ne mjetin e tij “BMË” X5 u gjet nje sasi cannabis sativa e ndarë në doza gati për shitje.
