Partizani ka zhvilluar ditën e djeshme stërvitjen e radhës para ndeshjes së të dielës ndaj Bylisit, e vlefshme për javën e 30-të të Kategorisë Superiore.
Tashmë nuk lejohet asnjë hap fals dhe të gjithë e dinë mirë këtë. Gjatë kësaj jave Kolela i ka pasur të gjithë lojtarët kryesorë në dispozicion dhe u ka dhënë shansin të ndërtojnë skema dhe të provojnë edhe gjëra të reja.
Ndikuar edhe nga fakti se ndaj Bylisit duhet të luajnë nga minuta e parë në sulm, Kolela pritet të vendosë një formacion sulmues ndaj ballshiotëve.
Pavarësisht se Cara është i vetmi sulmues anësor, Kolela pritet të tentojë të luajë sërish me tre sulmues, duke i rreshtuar lojtarët sipas skemës 4-3-3.
Me kthimin e tij pritet që Telushi të luajë nga minuta e parë sërish, duke ulur në stol Prekën dhe Menishin. Në sulm pritet që Cara, Mba dhe Da Silva ta nisin sërish.
