Koalicioni opozitar “Bashkë Fitojmë” ka prezantuar sot kandidatët për bashkitë e Konispolit dhe Sarandës, Fatmir Shero dhe Ardit Cikuli. Në prezantimin e tyre ka marrë pjesë kryedemokrati Sali Berisha dhe kreu i Partisë së Lirisë, Ilir Meta
Në fjalën e tij, Meta u ndal te koncesioni i qeverisë për privatizimin e Parkut Kombëtar të Butrintit, duke thënë sjellja e Rilindjes ka qenë kriminale ndaj kësaj pasurie.
Ai u shpreh se “Rilindja” ka dhënë në Sarandë leje ndërtimi për pallate pa asnjë vizion për të ardhmen.
“E tmerrshme që Saranda është e rrethuar nga uji dhe ende nuk e ka të zgjidhur situatën me ujin. Fondet e tenderat janë grabitur. Sjellje tërësisht anti-kombëtare dhe grabitqare, ajo e sjelljes së Rilindjes me Butrintin. Rilindja është sjellë si organizatë kriminale. Jep leje për pallate mbi pallatet, pa asnjë vizion për të ardhmen”, tha Meta.
Kreu i PL u ndal edhe te kandidati që socialistët kanë zgjedhur për Sarandën, Oltion Caci, i cili nuk ka lidhje me qytetin bregdetar por sipas opozitës është katapultuar aty nga klanet kriminale.
“Qëllimi ynë ka qenë prezantimi i kandidatëve që mbrojnë interesin e qytetarëve, ndaj u ndoq rruga e Primareve dhe kandidatët i zgjodhët vetë ju. Ju e dini si janë imponuar e katapultuar kandidatët e palës tjetër. Klani më i fortë bëri pagesat më të shumta e u parashutuan.
Këto tre javë të vrapojmë që të bisedojmë me çdo qytetar që t’i japim një mundësi Sarandës, sepse është një brand i jashtëzakonshëm që kërkon një vizion të jashtëzakonshëm që të kthehet në mundësinë e jetës për sarandjotët që ta shohin të ardhmen në këtë qytet”, deklaroi Meta.
