Policia greke ka arrestuar ditën e sotme 38-vjeçarin, Enivled Aliaj i cili ishte shpallur në kërkim ndërkombëtar për tentativë vrasje.
38-vjeçari është kapur në ishullin e Korfuzit, Greqi, me qëllim ekstradimi drejt vendi tonë.
Aliaj në 9 prill 2022, në shëtitoren e Sarandës, ka tentuar të vrasë duke goditur 6 herë me thikë shtetasin Dino Majko, aktualisht 30 vjeç, duke e plagosur rëndë.
Zënka mes Majkos dhe Aliajt nisi jashtë një lokali në lagjen nr.1 të Sarandës, rreth orës 21:50 dhe më pas të dy personat përfunduan duke u konfliktuar brenda tij. Dëshmitarët u shprehën të tronditur për skenën që panë në lokalin e natës, pasi ngjarja ndodhi në një kohë që në të kanë qenë klientë dhe turistë të shumtë.
30-vjeçari u godit të paktën 6 herë me thikë nga Aliaj në bark, shpinë, gjoks dhe kofshë, por fatmirësisht nuk pati hemoragji dhe pas disa kohësh në spital gjendja e tij u stabilizua.
1 muaj para ngjarjes Aliaj mësohet se i kishte dëmtuar më thikë gomat e makinës Majkos dhe dy ditë pas kësaj kishte kanosur me thikë brenda ambienteve të Spitalit të Sarandës ish-bashkëshorten e tij.
Për këtë ngjarje ndaj Aliajt ka një masë të dytë sigurimi “Arrest ne burg” dhënë nga Gjykata e Apelit Gjirokastër në 5 maj 2022 për veprën penale “dhunë në familje”.
Aliaj është me profesion peshkatar dhe njihet si person problematik dhe me rrezikshmëri shoqërore, pasi ka qenë protagonist i disa sherreve në qytetin bregdetar.
Njoftimi i policisë:
Policia e Shtetit
Finalizohet një tjetër operacion i përbashkët me homologët, për lokalizimin dhe kapjen e shtetasve të kërkuar ndërkombëtarisht, për krime kundër personit.
Operacioni policor i koduar “Ishulli“, u finalizua si rezultat i bashkëpunimit ndërmjet Policisë së Shtetit dhe Policisë së Greqisë, si dhe falë shkëmbimit të informacionit ndërmjet Interpol Tiranës dhe Interpol Athinës.
Tentoi të vriste një shtetas, rreth një vit më parë, në Sarandë, duke e goditur disa herë me mjet prerës (thikë), kapet në Korfuz dhe arrestohet për t’u ekstraduar drejt vendit tonë, 38-vjeçari i shpallur në kërkim.
Në kuadër të bashkëpunimit të vazhdueshëm me partnerët ndërkombëtarë, me qëllim lokalizimin, arrestimin dhe ekstradimin e shtetasve të shpallur në kërkim ndërkombëtar për vepra të ndryshme penale dhe si rezultat i shkëmbimit të menjëhershëm të informacionit ndërmjet Policisë së Shtetit dhe Policisë së Greqisë, për vendndodhjen e një shtetasi të kërkuar për krime kundër personit, kanë organizuar dhe finalizuar operacionin policor të koduar “Ishulli”,
Si rezultat i këtij operacioni, është kapur në Korfuz, Greqi dhe është arrestuar përkohësisht, me qëllim ekstradimin drejt vendit tonë, shtetasi i shpallur në kërkim ndërkombëtar E. A., 38 vjeç, banues në Sarandë.
Ndaj 38-vjeçarit, Gjykata e Rrethit Gjyqësor Sarandë ka caktuar masën e sigurisë “Arrest në burg”, për veprën penale “Vrasja me dashje”, mbetur në tentativë. Më datë 09.04.2022, në lagjen nr. 1, Sarandë, dyshohet se pas një konflikti të çastit, shtetasi E. A. ka goditur disa herë me mjet prerës (thikë), në pjesë të ndryshme të trupit, shtetasin D. M. dhe i ka shkaktuar atij, dëme serioze për jetën dhe shëndetin.
Interpol Tirana, në bashkëpunim me Interpol Athinën, vijojnë veprimet për ekstradimin e 38-vjeçarit, drejt vendit tonë.
Si policia dhe gjykata në Sarandë “ndihmuan” të shumëkërkuarin e plagosjes me thikë
