Kryetari i PD-së, Sali Berisha u shpreh këtë të Premte se ambasadorja amerikane në vendin tonë Yuri Kim, u ka kërkuar prokurorëve të SPAK arrestimin e tij.
“Shkonte çdo javë në ‘SKAP’ dhe thoshte: pse se arrestoni. Ata do e bënin me kënaqësinë më të madhe, por s’kishin prova”, tha Berisha këtë të Premte në një emisionin televiziv.
Më tej, ai shtoi se gjatë ushtrimit të detyrave që ka pasur, ka zbatuar gjithnjë ligjin.
Prokurorinë e Posaçme e quajti të kapur nga Rama. “Mbyllen çështje monstruoze, drejtësia sot është organizata më e kapur e këtij vendi”, tha Berisha.
Më tej, kryedemokrati tha se ndryshe nga ai, kryeministri Edi Rama është i përfshirë në afera të shumta korruptive.
“Zgjedhjet dhe burgu i hapur”, Berisha: Dy mesazhet që dha Escobar
Kryetari i Partisë Demokratike, Sali Berisha analizoi këtë të Premte komentet e zyrtarit amerikan Gabriel Escobar gjatë një interviste për mediat, dhënë gjatë vizitës së tij në Tiranës disa ditë më parë.
Berisha tha se Escobar dha dy mesazhe të rëndësishme sipas tij.
“Mesazhi i Escobar ishte se SHBA-të do bashkëpunojë me çdo force politike që fiton zgjedhjet”, deklaroi Berisha në emisionin “Zonë e Lirë”.
Më tej, u ndaj dhe te përgjigja që dha zyrtari amerikan kur u pyet për marrëdhëniet e SHBA-ve me kryeministrin Edi Rama dhe çështjes “McGonigal”.
“Tha: Është një proces penal i hapur, nën hetim. Do kjo të thotë derë burgu e hapur. Në interpretimin politik do të thotë varr politik i hapur. Ndaj dhe takimi (Rama-Escobar) u bë 20 minuta”, u shpreh Berisha.
Ambasadori i ri
Berisha foli edhe për ambasadorin e ri amerikan David Kostelançik, që pritet të vijë në Shqipëri si zëvendësues i Yuri Kim.
“A keni pasur kontakte të mëparshme dhe çfarë marrëdhënie keni me të”, u pyet Berisha në emisionin “Zonë e Lirë”.
Kryedemokrati u përgjigj: “Unë mbaj mend, mund ta kem taku ndonjëherë me ambasadorin, po gjëra të veçantë s’kam. Kam lexuar karrierën e tij të publikuar. Një karriere shumë e plotë. Dhe kam mirëpritur ndërrimin. Vjen në një situatë ku paraardhësja ka kontribuar sa asnjë njeri tjetër, ka dëmtuar reputacionin e të vendit të vetë siç tregojnë të gjitha studimet. Vjen në një moment kur elementë antiamerikanë, McGonigal, Rama dhe jo vetëm këta kanë nxitur ndjenja dhe qëndrime, reagime do të thosha. Por McGonigal mori vendin e vet, Edi Rama do ta ndjekë prapa. Shqipëria përsëri, opinioni i shqiptarëve përsëri do të rikthehet siç ka qenë ndaj aleatit strategjik kryesor, Shteteve të Bashkuara”.
