Partizani ka një çështje të rëndësishme për të zgjidhur me Engjëll Hotin. Pavarësisht këmbënguljes së klubit, mesfushori preferoi të firmoste vetëm për në sezon në verën e shkuar dhe në qershor atij i përfundon kontrata me “demat”.
Klubi po përpiqet të rinovojë me Hotin, por mesfushori deri më tani ka vendosur të mos zhvillojë asnjë bisedim në lidhje me këtë temë.
Kjo me shumë mundësi është edhe arsyeja përse Kolela e ka aktivizuar më së shumti nga stoli në ndeshjet e fundit.
Siç edhe mesfushori e ka shprehur vetë, ai do të shohë për oferta të tjerë në fund të sezonit.
Në këtë edicion ai ka zhvilluar paraqitje të mira dhe kjo ka ngjallur interes nga jashtë, që është akoma më i shtuar prej faktit që dardani del lojtar i lirë. Deri më tani shanset më të mëdha janë që Partizani ta humbasë Hotin në verë.
KAPITENI HOXHA – Alban Hoxha gjithashtu është një prej lojtarëve, të cilit i skadon kontrata në verë. Në fakt, në tri vitet e fundit ka qenë e njëjta situatë me kapitenin e të kuqve.
Ai gëzon një marrëdhënie shumë korrekte me drejtuesit prej vitesh dhe këtë e tregon edhe fakti që pranoi të qëndronte te Partizani edhe si lojtar stoli, megjithëse në ndeshjet që ka luajtur, ka treguar se mbetet ende në nivele të larta.
Gjithsesi, në verë do të ketë sërish bisedime, teksa gjithçka mbetet në dëshirën e 35-vjeçarit. Vetë Hoxha ka pranuar se në të ardhmen dëshiron të qëndrojë te Partizani në një rol drejtues apo menaxhues dhe ky fakt të çon në skenarin që ai ta mbyllë karrierën me fanellën e Partizanit, pavarësisht se nuk luan titullar.
Një tjetër skenar është një aventurë e fundit në Kosovë, ku Hoxha mund të sigurojë një kontratë më të mirë se çfarë mund ta sigurojë në Shqipëri.
RRAPAJ – Me vlonjatin të kuqtë kanë edhe dy vite kontratë, por pas këtij sezoni shumë të mirë, shanset janë që ai të largohet. Aktualisht Partizani ka një akord verbal me Ludogorets në lidhje me transferimin e mesfushorit në verë.
Bullgarët nuk e kaluan pagesën në janar dhe gjithçka mbeti në kuadrin e fjalëve. Megjithatë, në kontratën e Rrapajt ka një klauzolë prej rreth 200 mijë eurosh dhe me atë që 21-vjeçari ka bërë në këtë sezon është e sigurt se nëse nuk e paguan Ludogorets, një tjetër klub i madh europian do të trokasë në derën e të kuqve.
Valerenga në Norvegji ka qenë një nga klubet e interesuara për vlonjatin, por në verë me shumë mundësi lista do të zgjatet.
ATANASKOSKI – Maqedonasi, i cili është kthyer në titullar fiks në javët e fundit, gjithashtu ka kontratë deri në fund të sezonit.
Në ekipet e tjera në sezonet e fundit ai ka qenë titullar fiks, por te Partizani sivjet e nisi në stol.
Kjo e vuri në dilemë të ardhmen e tij, me Partizanin, që ka vendosur t’i japë së fundmi besim, me synimin edhe për t’i rinovuar kontratën. Gjithsesi, sërish mbetet gjithçka në dorën e lojtarit.
TELUSHI – Për vlonjatin, megjithëse ashtu si me Hoxhën, nuk ka një njoftim zyrtar nga ana e Partizanit në lidhje me kontratën e tij, por pritet të dalë lojtar i lirë në verë.
Klubi dhe Telushi kanë marrëdhënie shumë të mira dhe marrëveshja nuk pritet të jetë e vështirë.
Megjithatë, ka një “kleçkë” në lidhje me aktivizimin, pasi natyrshëm vlonjati dëshiron të luajë më shumë, sidomos tashmë që duket sikur ka rilindur si qendërmbrojtës.
ENGJËLL HOTI – Mesfushori 26-vjeçar është shprehur përpara disa javësh se mund të shohë opsione të tjera jashtë vendit në fund të sezonit.
Kjo dhe si pasojë se nuk aktivizohet rregullisht si titullar dhe duket se në një farë mënyre, i ka bërë “bllokadë” Partizanit.
/Panoramasport
