Si të mos mjaftonte eliminimi nga Liga e Kampionëve, Napoli ka humbur edhe tre titullarë në ndeshjen ndaj Milanit. Bëhet fjalë për sulmuesin Politano, mbrojtësin portugez Mario Rui dhe kapitenin e Kosovës, Amir Rrahmani.
Të tre kanë mbetur të dëmtuar ndaj kuqezinjve, teksa Politano e Mario Rui u zëvendësuan që në minutën e 34-t të pjesës së parë, ndërsa Rrahmani “ngriti flamurin e bardhë” pak minuta para fundit.
Dy të parët kanë probleme muskulore dhe në kampin napolitan i druhen një mungese të gjatë, teksa ekzaminimet më të detajuara pritet të kryhen këtë javë në Romë.
Ndërkohë më e mirë duket situata për Rrahmanin, që ka vetëm një lodhje muskulore, por mbrojtësi, bashkë me Politanon e Mario Ruin, nuk do të jenë gati për sfidën e fundjavës ndaj Juventusit në kampionat.
