Janë publikuar për herë të parë pamjet e atentatit të ndodhur mesditën e djeshme brenda ambienteve të lokalit “Coral” në pedonalen e Shëngjinit, ku u ekzekutua me armë zjarri biznesmeni dhe ish-kandidati për deputet i PSD, Ardian Nikulaj.
Në videon e publikuar nga televizioni “Ora News”, shihet se autorit me skafandër në kokë dhe jelek fosforeshent i janë dashur vetëm 10 sekonda për t’i marrë jetën 50-vjeçarit.
Nikulaj është duke folur në telefon, por në momentin që autori hyn në derë dhe e përshëndet ose thërret në emër sipas dëshmisë së vjehrrit të viktimës, biznesmeni lë në tavolinë celularin dhe kthen kokën në drejtim të tij.
Autori më pas bën 2-3 hapa në drejtim të tavolinës ku ishte ulur 50-vjeçari dhe me gjakftohtësi zbraz mbi të 6 plumba nga pistoleta tip “TT” me silenciator, madje duke iu afruar në fund si për t’u siguruar që shënjestra ka ndërruar jetë.
Sakaq, ngjarja e rëndë vijon të mbetet pa autor edhe pse ekzekutori rezulton të jetë larguar me motorin e tij me targa të huaja, të cilin përdori për të mbërritur në vendngjarje duke lënë përshtypjen te dëshmitarët okularë se ishte një postier.
Nga këqyrja e kamerave të sigurisë rezulton se ai ka vepruar i vetëm dhe ka përshkuar itinerarin e rrugës nacionale nga Shëngjini në drejtim të Lezhës, deri në fshatin Kakarriq ku ka humbur gjurmët në një zonë pa kamera.
Autori ka përshkuar me motor plot 18 kilometra, duke ju shmangur pa u vënë re dhe një pike kontrolli policore që ndodhej në hyrje të Lezhës.
Për pistat e hetimit, policia vijon të ketë dyshime për shkak edhe të aktiviteteve në biznes dhe influencës politike të Nikulajt në qarkun e Lezhës, ku ai do të kandidonte sërish në zgjedhjet e 14 majit si kandidat për këshillin bashkiak nën siglën e PSD-së së Tom Doshit.
Tre pistat ku po heton policia, janë ajo e përfshirjes në politikë, hakmarrja dhe konfliktet për shkak të bizneseve të cilat Nikulaj i kishte në pronësi në në Shëngjin.
Një ndër pistat e mundshme është edhe hakmarrja. Në vitin 2000 anëtarë të fisit Palaj i kanë vrarë vëllanë dhe pas kësaj janë vrarë 2 persona nga kundërshtarët, vrasje te cilat mbeten ende pa autor.
Pas atentatit në Shëngjin policia ka kryer kontrolle në disa banesa që u përkasin atyre, por burime bëjnë me dije se shume prej tyre ndodhen jashtë vendit verifikuar dhe nga sistemi TIMS.
Policia ka punuar deri në orët e vona të natës së bashku me grupin hetimor në vendin ku ka ndodhur ngjarja, gjithashtu janë kryer dhe këqyrja e kamerave të sigurisë.
