Beteja për Shkodrën në zgjedhjet e 14 majit cilësohet nga politikanë dhe analistë si një prej më të ashprave në 30 vite, pasi kryeministri Edi Rama synon me ngulm “të rrëmbejë” nga duart e demokratëve Kryeqendrën e Veriut.
Me ish-drejtorin e FSHZH, Benet Beci dhe një paketë investimesh si premtim elektoral Rama që e mban peng zhvillimin e turizmit, infrastrukturës dhe ekonomisë në Shkodër vetëm prej bindjeve të majta dhe faktit se qyteti është një bastion i PD, synon të thyejë hegjemoninë e djathtë.
Pavarësisht enturazhit të pushtetit dhe mobilizimit për të “rrëzuar” kalanë e vetme të demokratëve në këto zgjedhje, Rama gjen përballë një kryebashkiak si Bardh Spahia, që në vetëm një vit si qytetari i parë i Shkodrës ka arritur të fitojë besimin e të paktën 55.6% të qytetarëve, siç tregon një sondazh i “Angi Richerce”, publikuar në Top Story.
Ish-mjeku i qytetit dhe njëherësh ish-deputeti i PD e fitoi bashkinë teksa konkurroi në siglën e “Shtëpisë së Lirisë” në zgjedhjet e pjesshme të 6 Marsit 2022, duke marrë 20125 vota, ose 43.67% të tyre.
Në vendin e dytë u rendit kandidatja e Partisë Socialiste, Majlinda Angoni me 18205 vota, ose 39.51%, por ajo çka do ta bënte më të thellë fitoren e demokratëve ishte fakti që PD e Lulzim Bashës garoi gjithashtu me Xhemal Bushatin, i cili arriti të marrë 7749 vota, ose 16.82%.
Në kushtet aktuale, kur kandidati i vetëm i opozitës në garë është Spahia me koalicionin “Bashkë Fitojmë” dhe PD e Alibeajt nuk pati mbështetje në elektorat për të nxjerrë një kandidat në Shkodër, gjasat janë që fitorja e kryebashkiakut aktual të jetë edhe më e thellë.
Ndërkohë, sipas sondazhit qytetarët janë pyetur se si e gjykojnë punën e kryetarit aktual të Bashkisë së Shkodrës dhe 23.4% e tyre mendojnë se është shumë pozitive, ndërsa mjaftueshëm pozitivë janë shprehur 32.2 %.
Rrjedhimisht të kënaqur nga puna e Spahiut janë 55.6 % e personave të pyetur gjatë sondazhit.
Sakaq, mjaftueshëm negative e mendojnë 26.1 % e të anketuarve, shifër e cila pasohet nga opsioni shumë negative me 18.3 %.
Ndërkohë, nëse zgjedhjet lokale do të zhvilloheshin nesër, fitues do të shpallej Bardh Spahia me 53% të votave. Sipas sondazhit të “Angi Ricerche” dhe Top Channel, shkodranët duan kandidatin e koalicionit “Bashkë Fitojmë” dhe kryetarin aktual të bashkisë.
Ndërkohë, sipas sondazhit të realizuar në bashkinë e Shkodrës, kandidati socialist Benet Beci, merr 47% të votave nëse zgjedhjet do të zhvilloheshin nesër.
Sondazhi i “Angi Ricerche” dhe “Top Channel” në Bashkinë e Shkodrës është zhvilluar nga data 14 deri më 18 prill të vitit 2023. Gjithsej, janë intervistuar 811 zgjedhës, mbi moshën 18-vjeçare, ndërsa marzhi i gabimit llogaritet të jetë +/- 2.2 për qind.
