Partizani ka nisur ditën e djeshme përgatitjet për ndeshjen e së dielës ndaj Bylisit. Ballshiotët deri më tani kanë rezultuar një kundërshtar i lehtë për të kuqtë, pasi në tri përballje gjithsej, i kanë fituar të gjitha.
Megjithatë, çdo ndeshje ka një histori të re dhe kështu pritet të jetë edhe në stadiumin e kuq të dielën, ku Bylisi kërkon pikët për të mbijetuar, ndërsa Partizani e ka më shumë se detyrim fitoren, pasi kërkon që t’i afrohet Tiranës, e cila luan në një transfertë “ferri” si ajo ndaj Vllaznisë.
Ditën e djeshme në orën 16:00, nën urdhrat e Kolelës ishin të gjithë lojtarët. Lajmi i mirë është se trajneri e ka grupin e plotë.
Atanaskoski, Telushi dhe Cara luajtën ndaj Laçit dhe pritet të jenë titullarë edhe ndaj Bylisit, ku Kolela me shumë mundësi do të luajë me klasiken 4-3-3.
