Kreu i Partisë së Lirië Ilir Meta ka uruar Kosovën për liberalizimin e vizave, vendim që u miratua këtë të martë në Parlamentin Europian.
Përmes një postimi në facebook, ish-presidenti Meta thotë se kjo padrejtësi për qytetarët e Kosovës, mori fund.
Ai shkruan më tej se “Europa ka ditur gjithnjë t’i vlerësojë qeveritë pro-evropiane, siç ka ndodhur me Shqipërinë kur arritëm liberalizimin në vitin 2009.”
Postimi i plotë i Metës:
Urime Kosovës sonë!
Një padrejtësi mori fund. Parlamenti Europian vendosi që qytetarëve të Kosovës t’u liberalizohen vizat. Ishte padyshim diskriminuese që vazhdoi kaq gjatë izolimi i Kosovës, megjithatë e përgëzoj nga zemra çdo qytetar e çdo institucion të Kosovës për këtë hap të madh drejt integrimit europian.
Faktorët ballkanikë që e duan Europën jashtë Ballkanit, edhe kësaj radhe dështuan. Europa ka ditur gjithnjë t’i vlerësojë qeveritë pro-evropiane, siç ka ndodhur me Shqipërinë kur arritëm liberalizimin në vitin 2009, siç po ndodh edhe sot në Kosovë.
