Ekspertja e ekonomisë, Brisida Shehaj ka denoncuar sot përdorimin e pjesës më të madhe, rreth 60% të buxhetit të bashkisë së Tiranës nga Erion Veliaj për shlyerje pagash, bileta avioni dhe arredime zyrash.
“Veliaj rri 4 muaj jashtë, fluturime me avion, lyerje zyrash, qoka, shpenzime operative të aparatit dhe për ambientet ku qëndrojnë punonjësit e bashkisë Tiranë. Është skandaloze që 60% e buxhetit të bashkisë të përdoret për personel dhe shpenzime operative për mirëmbajtje zyrash, bileta avioni, naftë, printime. Që do të thotë gjithë ky buxhet nuk është në efiçencë”, tha Shehaj.
Sipas Shehajt, vetëm 18.9% e buxhetit, prakitkisht 39 milionë dollarë është shuma që është shpenzuar për investime publike si rikonstruksioni i rrugëve apo dhe restaurimi apo ndërtimi i shkollave, kopshteve apo çerdheve.
“Nëse në vitin 2016, harxhoheshin 34 mln dollarë në vit për personelin, në vitin 2021 janë 61 mln dollarë. Kemi 27 mln dollarë më shumë. Nëse për shpenzimet kapitale, investimet që kryhen, rrugët, investimet madhore, harxhoheshin 49 mln dollarë, për vitin 2021 harxhohen vetëm 39 mln dollarë, 10 mln dollarë më pak.
Nëse në vitin 2016 rreth 34% e buxhetit shkonte për investimet kapitale, në vitin 2021 vetëm 18.9% e buxhetit shkon për investime kapitale dhe 63% shkojnë për paga dhe shpenzime operative”, nënvizoi ajo.
