Numri i lartë i emigrantëve që u kthyen në vendlindje për të kremtuar Pashkën Ortodokse, ashtu siç edhe pritej ka shkaktuar këtë të hënë një fluks lëvizjeje dhe radhë të gjata në pikat e kalimit kufitar me Greqinë.
Emigrantët duke shfrytëzuar ditën e pushimit janë duke u kthyer drejt shtetit helen ku punojnë dhe jetojnë, duke bërë kështu që në Kakavijë dhe Kapshticë të raportohet për një numër të lartë të lëvizjeve të automjeteve.
Nga policia kufitare në Kapshticë bëhet me dije se në palën shqiptare po punohet me sportele maksimale, tre në dalje dhe tre në hyrje, ndërsa pala greke ka krijuar vonesa për shkak se po punon me sportele të reduktuara.
Mijëra emigrantë shqiptarë zgjodhën këtë vit që të kalonin festën e Pashkës në atdhe, ndërsa ka qenë mjaft i lartë edhe numri i daljeve nga territori shqiptar, për ta festuar Pashkën në Greqi.
Në pikën Kufitare të Kapshticës u regjistruan të dielën 3143 shtetas në hyrje të territorit tonë, ndërsa çuditërisht ishte më i lartë numri i atyre që dolën nga Shqipëria, plot 3463 shtetas.
Po ashtu në pikën e kalimit Kufitar të Kakavijës, rreth 20 mijë shtetas hynë në Shqipëri përgjatë javës që shkoi, ndërsa 12 mijë qytetarë lanë vendin përmes të njëjtës doganë në të njëjtën periudhë kohore.
