Një sherr brenda një kompleksi sportiv është regjistruar në Vlorë. Mësohet se për ngjarjen është arrestuar një 56-vjeçar, i cili sipas policisë ka goditur me grushte trajnerin e ekipit sportiv “Labëria”, Dritan Resuli.
“Specialistët për Hetimin e Krimeve të Komisariatit të Policisë Vlorë arrestuan në flagrancë shtetasin A. A., 56 vjeç, banues në Vlorë, për veprën penale “Goditja e sportistit, trajnerit, ndërmjetësit sportiv”, pasi ditën e djeshme, në kompleksin sportiv “Labëria”, për motive të dobëta, dyshohet se ka goditur me grusht, trajnerin e ekipit sportiv “Labëria”, shtetasin D. R., 46 vjeç, banues në Vlorë”, njofton policia.
Resuli nuk ka qenë në pankinë për shkak të dënimit nga Komisioni i Disiplinës në FSHF, por mësohet se agresori është një prej prindërve të futbollistëve të Labërisë, i pa aktivizuar në këtë takim.
Dyshohet se prindi i lojtarit i ka kërkuar llogari trajnerit për mosaktivizimin në ndeshjen e djeshme dhe më pas e ka goditur me grusht.
Sakaq, në ndeshjen e luajtur për javën e 19-të të Kategorisë së Dytë në futboll, Labëria fitoi 3-0 me AF Luftëtari duke marrë tri pikë të rëndësishme në garën për zonën e promovimit në grupin B.
Materialet procedurale i kaluan Prokurorisë, për veprime të mëtejshme.
