Kryetari i komanduar i Partisë Demokratike, Enkelejd Alibeaj me një letër-ankesë drejtuar Autoritetit të Mediave Audiovizive kërkon që të monitorohen dhe hetohen televizionet që sipas tij vazhdojnë t’i referohen Sali Berishës si kryetar dhe “Rithemelimit” si PD.
Kërkesa i është drejtuar dhe Komisionit Qendror të Zgjedhjeve, ku kërkohet që të mos përdoren më cilësimet ndaj Berishës si “Kryetar i Partisë Demokratike”, “Partia Demokratike Grupi i Rithemelimit”, “Fraksioni i rithemelimit në Partinë Demokratike”, pasi sipas tij një subjekt i tillë zgjedhor nuk është regjistruar në zgjedhje.
“Megjithëse drejtimi i Partisë Demokratike dhe mosregjistrimi i grupimit të vetëquajtur “Rithemelimi” si subjekt zgjedhor këto janë fakte publike, të njohura dhe të raportuara nga vetë subjektet mediatike, këto të fundit vazhdojnë që në shkelje të ligjit nr. 97/2013 “Për mediat audiovizive në Republikën e Shqipërisë”, t’i referohen z. Berisha, si kryetar i Partisë Demokratike dhe të përdorin në emisionet informuese qëndrime që nuk përkojnë me realitetin ligjor dhe zgjedhor. Kjo sjellje përveçse përbën keqinformim, krijon konfuzion të qytetarëve, përsa i përket lidershipit zyrtar të kësaj force politike, pjesëmarrjes në zgjedhje dhe kandidaturave të mbështetura nga ana e saj, duke passjellë cenimin e interesit publik”, thuhet në kërkesën e grupit “Alibeaj”.
