Durrësi nuk ka gjetur qetësi mbrëmjen e djeshme pasi dy të rinj janë plagosur me armë zjarri pas një sherri në “TikTok” me një tjetër të ri të identifikuar si Klajdi Mancaku, i njohur për shoqërinë e tij me Cleviol Ahmeti, edhe ky person me precedentë penalë. Kujtojmë këtu përplasjen që pati me reperin Noizy pak kohë më parë.
Mësohet se Mancaku, në orët e para të mëngjesit, rreth orës 01:15 minuta, në lagjen nr. 10, ka debatuar në telefon me shtetasin Mario Vrioni, kushëriri i një prej të plagosurve Jurgen Vrioni, dhe i ka lënë për t’u sqaruar pranë banesës së tyre.
Ata janë konfliktuar fillimisht në rrjetin social Tik Tok e më pas kanë lënë takim për “t’u sqaruar”.
Mario Vrioni, pasi ka marrë kushëririn e tij shtetasin Jurgen Vrioni, dhe shtetasin Arbër Haxhiu, që po ashtu mbeti i plagosur, (shok i përbashkët i tyre) ka shkuar në vendin ku e kishin lënë për tu sqaruar me Mancakun.
Ky i fundit sapo ka parë që këta shtetas janë afruar, ka qëlluar me armë zjarri në drejtim të makinës së shtetasit Mario Vrioni, dhe është larguar menjëherë.
Si pasojë, (dyshohet nga plumb rikoshet) janë lënduar lehtë shtetasi Jurgen Vrioni, i cili pas ndihmës mjekësore ka dalë nga spitali, dhe shtetasi Arbër Haxhiu, që aktualisht po merr ndihmë mjekësore dhe është jashtë rrezikut për jetën.
Grupi hetimor në bashkëpunim me Prokurorinë po vijon punën për dokumentimin e plotë të rrethanave të ngjarjes.
Ndërkohë nga shërbimet e Policisë janë ngritur pika kontrolli, në akset rrugore, janë njoftuar pikat e kalimit kufitar, dhe po ushtrohen kontrolle në banesa e ambiente ku dyshohet se mund te fshihet 25 vjeçari me qëllim kapjen e tij.
