Wojciech Szczensy ka dhënë informacion për gjendjen e tij shëndetësore pasi ndjeu mbrëmë dhimbje në kraharo. Juventus po luante kundër Sporting Lisbonës, ndërsa portieri i “Zonjës së Vjetër” ndjeu shtrëngim në gjoks.
32-vjeçari la fushën, ndërsa në skuadër u panikosën për gjendjen e tij. Stafi mjekësor u kujdes deri në mbërritjen e “gardianit” në spital. Ai u pa me lot në sy teksa po linte fushën, duke i lënë vendin portierit Mattian Perin.
Juventusi konfirmoi se Szczesny, i cili më pas vazhdoi në dhomën e zhveshjes, ishte mirë sa i përket frymëmarrjes. “Pas një kontrolli fillestar, ai është mirë”, njoftoi klubi italian në “Twitter”. Siç ka raportuar “Sky”, ish portieri i Arsenalit iu nënshtrua ekzaminimeve më të detajuara përmes elektrokardiogramit.
“Isha i trembur, nuk isha në gjendje të merrja frymë, por tani ndihem mirë. Testet e konfirmuan se nuk ka ndonjë problem”, tha portieri polak.
