Kryeministri Edi Rama çeli pasditen e djeshme fushatën elektorale të Partisë Socialiste, duke mbjellë 61 pemë në sheshin “Skënderbej”, me drejtuesit politik të qarqeve dhe kandidatët për kryetarë bashkie në zgjedhjet e 14 Majit.
Në këtë organizim nuk munguan as deputetët e PS, me disa prej tyre shumë të përfshirë në takime dhe fotografitë e rastit. I vetmi i veçuar nga pjesa tjetër e grupit të selisë rozë ishte ish-zëvendësministri i Financave, Arben Ahmetaj.
Ajo ç’ka ra në sy ishte prezenca e tij në këtë organizim, pavarësisht përplasjes në distancë me Ramën dhe “heshtjes” vrasëse të Taulant Ballës kur pyeetet për “mesazhet e fshehta” që ish-ministri dhe kryeministri i adresuan njëri-tjetrit në “Opinion”.
Edhe pse mbetet emri më i përfolur për të përfunduar pas hekurave nga kampi i socialistëve, Ahmetaj duket moskokëçarës ndaj hetimeve të Prokurorisë së Posaçme për përfshirjen e tij në aferën e inceneratorëve.
Ashtu si dy javë më parë që u shfaq i pashqetësuar në Parlament dhe u fotografua duke shkëmbyer batuta me kolegët Fadil Nasufi, Luljeta Bozo apo Vullnet Sinaj, edhe dje ish-zv/kryeministri u duk i qetë edhe pse SPAK e ka vendosur zyrtarisht nën akuzë për “shpërdorim detyre”, “korrupsion pasiv” dhe “pastrim i produkteve të veprës penale”.
Pavarësisht kësaj, edhe pse mori pjesë në nisjen e fushatës, ai u shfaq i mënjanuar ndërsa të vëmendshëm ishin edhe kameramanët e regjisë së Ramës, të cilët u kujdesën që të mos e inkuadrojnë Ahmetajn.
Nuk dihet nëse Ahmetaj ishte i ftuar apo jo, por gjatë ceremonisë nuk u pa të takohej apo shkëmbente përshëndetje me kryeministrin.
LEXO EDHE:
FOTO/ Arben Ahmetaj i bën karshillëk SPAK-ut, shfaqet i buzëqeshur në Kuvend
