Manchester City ka arritur një fitore spektakolare 3-0 përballë Bayern Munich, sfidë e parë çerekfinale në Champions League.
Skuadra angleze tregoi se është një nga pretendentët e kompeticionit duke mundur pastër një rival si kampionët e Gjermanisë.
Në minutën e 22-të, Erling Haaland shfaqet mrekullisht para portës së Sommer, e majta e tij nuk ishte e fortë, duke u neutralizuar menjëherë nga “gardiani” i kampionëve të Gjermanisë.
Pak më pas, “Qytetarët” do finalizonin me sukses një aksion. Do ishte Rodri që do shënonte si në “Play Station”, spanjolli nga larg ia doli të “shkundë merimangat”.
Sommer sërish protagonist në fund të fraksionit, pasi me një dalje i mohoi golin e dytë skuadrës së drejtuar nga Pep Guardiola.
Anglezët do mund të dyfishonin shifrat në të 70-tën, me Silvan. Bavarezët bëjnë gafë në mbrojtje, gabim i cili rezulton fatal. Vendasit do thellonin akoma më shumë shifrat, Erling Haaland do linte gjurmën e tij në këtë takim dhe do bënte që Manchester City të shkonte i qetë në ndeshjen e kthimit.
Tashmë, Manchester City është me “një këmbë” në gjysmë-finalet e UEFA Champions League dhe pret tashmë rezultatin e ndeshjes së kthimit, ndeshje që do të zhvillohet mbrëmjen e 19 prillit, në “Allianz Arena” aty ku gjermanët që nuk kanë asgjë për të humbur tashmë premtojnë luftë të vërtetë përballë “qytetarëve”.
