Komisioni Qendror i Zgjedhjeve do të mblidhej këtë të hënë për të përcaktuar renditjen e kandidatëve për kryetar bashkie në fletët e votimit për bashkitë Tiranë, Kamëz, Lushnje, Durrës, Elbasan, Berat, Fier, Vlorë, Korçë, Lezhë dhe Shkodër.
Por mbledhja në fjalë është shtyrë dhe këtë e bëri të ditur kreu i KQZ, Ilirjan Celibashi, i cili pohoi për mediat se shkak janë bërë ankimimet për 3 kandidatët për kryetarë bashkie, në Shijak, Mallakastër dhe Kuçovë, lidhur me ligjin e dekriminalizimit.
Kërkesa për shtyrjen e hedhjes së shortit është bërë nga Partia Socialiste.
“Në seancën e sotme kemi zhvillimin e procedurave për hedhjen e shortit për renditjen e disa kandidatëve për kryetarë bashkie në disa bashki, por do ta shtyjmë sepse kemi marrë një kërkesë nga një subjekt zgjedhor, i cili kërkon që të bëhet hedhja e shortit, paraprakisht, për subjektet zgjedhore dhe pastaj për kandidatët për kryetarë bashkie. Edhe për këta të fundit, të bëhet për të gjithë në të njëjtën kohë”, tha Celibashi.
Sipas kreut të KQZ mbajtja e shortit pritet pas marrjes së një vendimi për ankimet në KAS dhe Kolegjin Zgjedhor, në lidhje me kandidatët Rezeart Tusha, Qerim Ismailaj dhe Kreshnik Hajdari.
Celibashi tha se për këto dy raste, ditën e mërkurë do të hapet procesi, dhe nëse rezulton se do të jetë nevojë për hetim të thelluar, do të angazhohet Prokuroria për ta bërë. Ai po ashtu bëri me dije se janë duke u shqyrtuar edhe tre raste që lidhen me regjistrimin e kandidatëve, një për këshillat bashkiakë dhe dy për kryetar bashkie.
“Sa i përket pretendimeve në dy raste, mbi përputhshmërinë me ligjin për dekriminalizimin, me shumë mundësi të mërkurën do hapim procesin e shqyrtimit të kërkesave. Nëse do jetë rasti për procedim me hetim të theluar, do i kërkojmë Prokurorisë të angazhohet, në të kundërt do merret vendimi nga komisoneri për këta kandidatë. Presim shqyrtimin e tre rasteve që lidhen me regjistrimin e kandidatëve, s’ka të bëjë me verifikimin për dekriminalizim, por po shqyrtojmë aspekte teknike të regjistrimit. Bëhet fjalë për një për anëtarë këshilli dhe dy kandidatë për kryetarë bashkie, mos gaboj është Devolli dhe bashkia Finiq”, deklaroi Celibashi.
“Meqenëse për 3 kandidatë jemi akoma në procedurë shqyrtimi të ankimeve, do duhet të presim përfundimin ne shqyrtimit të ankimeve në KAS dhe në Kolegjin Zgjedhor”, shtoi ai.
Celibashi është shprehur gjithashtu se çdo kandidat do të verifikohet, për të parë nëse ndonjë prej tyre nuk duhet të kandidojë për shkak të ndalesës që imponon ligji për dekriminalizimin.
“Janë 23 mijë e 820 kandidatë për kryetar bashkie dhe për këshillat bashkiakë. Ata mund ti nënshtrohen procesit të verifikimit për të parë nëse dikush nuk duhet të kandidojë për shkak të ndalesave që imponon ligji për dekraminalizimin”, tha Celibashi.
