Kukësi i drejtuar nga Rrahman Hallaçit i rezistoi Tiranës për 90 minuta, por nuk ishte e thënë të kthehej nga “Elbasan Arena” me rezultat pozitiv.
Verilindorët u mundën 2-1 nga bardheblutë, sfida u vendos në fund nga një penallti. Pas takimit, Hallaçi u shpreh:
“Nuk të vjen mirë kur pëson gol në fundin e ndeshjes, pasi mendoj që skuadra ishte në ekuilibër, e kemi kontrolluar lojën. Pjesa e parë shkoi mirë, më pas pjesa e dytë ishte më e mirë. Duke parë që edhe kundërshtari i mbyll pak në mbrojtje.
Rrezikuam disa herë portën e Tiranës, por nuk më bind penalltia e dhënë dhe më vjen keq. Nuk dua të merrem shumë me pjesën e gjyqtarit, por nuk e di pse u dha penalltia. Supi nuk quhet dorë dhe futbollisti nuk mund të kërcejë me dorën ngjitur. Ky është mendimi im, nuk ishte penallti dhe më vjen keq për skuadrën, sepse luajti mirë për të marrë një pikë, madje ishim afër fitores.
I dimë vështirësitë ku ndodhemi, duhet të punojmë shumë dhe të reagojmë, pasi kampionati është futur në një fazë kritike. Sot ishim përgatitur për të marrë rezultat pozitiv, pasi çdo pikë që na ikën do ta ndjejmë më pas. Luajtëm mirë, por nuk mjafton në këtë moment, sepse kemi nevojë për pikë. Duhet të gjejmë forcat që të reagojmë, skuadra ishte e mërzitur dhe duam që çunat të lënë pas krahëve këtë moment.
Është zgjidhur problemi i pagave? Kam parë që është shkruar që skuadra nuk ka dalë në stërvitje, por ne kemi bërë 2 seanca stërvitore në palestër dhe te liqeni artificial. E gjithë kjo është një keqkuptim” – Tha ai.
