Ministrja e Jashtme Olta Xhaçka është paraqitur në mesditë në ambientet e Prokurorisë së Posaçme (SPAK).
Kjo është hera e dytë që ministrja shkon në SPAK për të dhënë deklaratat e saj, brenda pak javësh.
Ballafaqimi i Xhaçkës me prokurorët e SPAK vjen pasi ndaj saj rëndon një kallëzim i dorëzuar nga ish/zv-komandanti i forcave detare, Artur Meçollari lidhur me privatizimin e pronave të ushtrisë dhe më konkretisht bazës detare të Limionit në Sarandë. Organi i akuzës ka mbledhur të gjitha provat shkresore për këto prona dhe tashmë pritet dëshmia e personave përgjegjës që kanë firmosur për to, ku përfshihet edhe Xhaçka.
- Baza detare e Sarandës “dhuratë” oligarkëve
Prokuroria e Posaçme kundër Krimit dhe Korrupsionit (SPAK) ka vendosur në sekuestro preventive bazën detare në Sarandë, pasi Meçollari ka akuzuar në mars të 2021 të gjithë zyrtarët e lartë, përfshirë edhe ish-ministren e Mbrojtjes aso kohe, Olta Xhaçka dhe Presidentin Bajram Begaj.
Denoncimi nga ana e Meçollarit u bë për dy prona, një në Shëngjin dhe një në Sarandë të cilat sipas tij janë dhënë pa leje i janë dhënë privatit. Sa i përket kallëzimit mbi bazën detare të ushtrisë në gjirin e Limonit, kjo pronë është tashmë në duart e biznesmenëve Shefqet Kastrati dhe Artan Dulaku.
Dy biznesmenët në fjalë, të rreshtuar në krah të kryeministrit Rama pritet të investojnë në këtë bazë për projektin “Marina Town Saranda”, që është një kompleks hotelesh, rezidencash dhe një port jahtesh që do të shtrihen përgjatë bregut të Jonit.
Sakaq, ish zv/komandanti i bazës detare Artur Meçollari, akuzon ish-ministren Xhaçka dhe ish-shefin e Shtabit Bardhyl Kollçaku se nuk kanë marrë miratimin e Forcës Detare për dhënien me qira të kësaj baze detare te “investitorët strategjikë” të qeverisë Rama.
