Herët në mëngjes, kryeministri Edi Rama nisi një mbledhje me Kryesinë në selinë e Partisë Socialiste, për të dhënë direktivat e fundit në kampin e majtë, 7 ditë përpara nisjes së fushatës elektorale për zgjedhjet lokale të 14 majit.
Me PS që në 44 bashki vendosi të garojë me kryetarët aktualë, duke u besuar një mandat tjetër, duket se edhe strategjia e fushatës zgjedhore do të jetë e orientuar drejt punëve që këta drejtues lokale kanë kryer sipas Sekretarit të Përgjithshëm, Damian Gjiknuri.
Gjiknuri foli për mediat pas mbledhjes dhe nënvizoi se PS nuk ka për qëllim organizimin e tuibemeve masive, por do të bëjë fushatë me takime në grupe të vogla qytetarësh.
“Në mbledhje u diskutua nga të gjithë anëtarët për strategjinë dhe kalendarin e aktiviteteve që shumë shpejt do i bëjmë publike. Ishin mbledhje organizative ku të gjithë anëtarët e kryesisë dhanë mendimet. Hyjmë të sigurtë me një strategji të mirëmenduar. Kemi menduar të mos bëjmë aktivitete masive, nuk duam të bërtasim, por t’u tregojmë njerëzve se çfarë pune kemi bërë. Aktivitetet do fillojnë javën tjetër në përputhje me kodin zgjedhor”, tha Gjiknuri.
Gazetarët e pyetën Sekretarin e PS edhe për strategjinë e fushatës së kundërshtarëve politikë, për të cilët ai pati rezerva duke thënë se opozita synon të ofrojë “revolucionin”, për të cilin sipas të majtëve populli nuk ka nevojë.
“Kundërshtarët politikë janë të zhytur në rublat ruse, por strategjia jonë është ajo e ndërtimit të të ardhmes. E shikojmë strategjinë e zhvillimit kurse pala tjetër ka vetëm një slogan që është “përmbysje, revolucion” që nuk është në përputhje me atë që duan shqiptarët”, theksoi Gjiknuri.
