Në Gjykatën e Hagës prej orës 09:00 të kësaj të mërkure ka vijuar seanca gjyqësore ndaj katër ish-krerëve të Ushtrisë Çlirimtare të Kosovës.
Gjatë seancës së sotme deklaratën hyrëse e dha mbrojtja e ish-zëdhënësit të UÇK dhe njëherësh ish-kryeparlamentarit të Kuvendit të Kosovës, Jakup Krasniqi.
Ndërkohë, në fjalën e tij Krasniqi ka mohuar të gjitha akuzat e Prokurorisë, duke ripërsëritur se nuk e kupton logjikën e aktakuzës që është ngritur ndaj tij.
Fjalën, ai e ka nisur duke prezantuar një autobiografi të tij që nga lindja, për të kaluar më pas në aktivitetin politik.
Duke treguar se vetë ka qenë i dënuar nga ish-Jugosllavia, Krasniqi u shpreh se akuza që i bëhet tani është e paarsyeshme. Ai gjithashtu shtoi se integriteti i tij personal dhe intelektual nuk do ta lejonte që të përdorte ndaj dikujt dhunë si mjet.
“Unë e urrej dhunën, vrasjet, burgosjet, torturat, dënimet, jo pse janë ushtruar ndaj meje dhe ndaj nesh si popull por janë tepër të ulëta dhe çnjerëzore. Çdo njeri që flet të vërtetën e di që asnjëherë nuk kam qenë i përfshirë në asnjë vrasje, burgosje, e presion ndaj askujt”, tha Krasniqi.
Duke mohuar kategorikisht përfshirjen në ndonjë vrasje apo burgosje, ose edhe ndonjë formë tjetër të presionit, ish-kryeparlamentari tha: “Çdo njeri që flet të vërtetën le të thotë se unë Jakup Krasniqi asnjëherë s’kam qenë i përfshirë në asnjë vrasje e në asnjë burgosje apo në asnjë formë të presionit ndaj kujtdo qoftë. E kam pasur të qartë se cilat mjete duhet të përdoren për të realizuar çlirimin kombëtar në luftën kundër atyre që ushtruan gjenocid ndaj nesh”.
Krasniqi gjithashtu nënvizoi se është absurde të akuzohet për persekutimin e anëtarëve të LDK-së, kur ai vetë ka qenë pjesë e kësaj force politike si kryetar i degës së Drenasit që nga fundi i vitit 1997 deri në prill të vitit 1998.
“Unë vet isha anëtar i LDK-së. Familjarët e mi ishin anëtarë të LDK-së. Vetëm një mendjeje të çoroditur mund t’i ketë lindur ideja që unë kam mundur të isha pjesë e persekutimit tim, të familjarëve të mi dhe bashkëluftëtarëve të mi”, u shpreh Krasniqi.
Më tej, Krasniqi sqaroi se pjesë e LDK-së ishte edhe vëllai i tij, Agimi, ndërsa shtoi se në zgjedhjet e pasluftës, mbesa e tij, Mimozë Krasniqi, si anëtare e LDK-së u zgjodh asambliste në Drenas.
“Pa marrë parasysh se pas përfundimit të luftës kemi vepruar në parti politike të veçanta, unë ruaj kujtimin dhe respektin për anëtarët e LDK-së me të cilët kemi vepruar në rrethana tejet të rënda”, nënvizoi ai.
