Një atentat me eksploziv tronditi mesditën e djeshme zonën e Shkozetit në Durrës, teksa u hodh në erë në lëvizje automjeti tip “Golf 6” i një 37-vjeçari me precedentë të theksuar kriminal dhe mik i “Rrumit” të Sukthit.
Aldi Mustafa ishte në lëvizje me makinën e tij në momentin e shpërthimit, por fatmirësisht ia hodhi paq, pa lëndime, edhe prej faktit se lënda plasëse ishte montuar në gomën e pasme të mjetit, në krahun e pasagjerit.
Ndërkohë, menjëherë pas ngjarjes policia ka shoqëruar 8 persona që mund të kenë dijeni mbi atentatin e mbetur në tentativë ndaj Mustafës.
Gjithashtu uniformat blu kanë marrë dëshminë e 37-vjeçarit që ishte ‘shënjestra’ dhe të familjarëve të tij.
Aldi Mustafa, i cili njihet si mik i ‘Rrumit’ të Sukthit, ka mohuar të ketë konflikte duke u shpreh se nuk ka dijeni se cili fshihet pas sulmit me eksploziv.
“Makinën e kam lënë të parkuar para shtëpisë gjithë natën. Nuk ka qenë makina në servis. Kur e mora makinën në drekë shpërtheu. Nuk e si kush e ka vënë lëndën plasëse. Media me ka ngatërruar keq me akuzat që më thonë. Është faji i gazetarëve që me veshin me ngjarje që nuk kam lidhje. Nuk kam konflikte. Gjejeni ju si polici kush e ka vendosur eksplozivin”, mësohet të ketë thënë 37-vjeçari para oficerëve.
Sakaq në skedën e 37-vjecarit rezulton se ai ka qenë i përfshirë në një plagosje të ndodhur në 2001 në zonën e plazhit dhe para një viti u arrestua me 3 armë zjarri në makinë, ngjarje për të cilat është gjykuar e dënuar.
Ndërkohë, në lidhje me shpërthimin po hetohet në disa pista, pasi dyshohet se autorët kanë dashur ta paralajmërojnë ose kërcënojnë duke i dërguar një mesazh domethënës dhe në publik.
LEXO EDHE:
Shqipëria nuk gjen qetësi/ Atentat me eksploziv ndaj “të fortit” të Durrësit (EMRI)
